fasl-e-gul ho ki KHizan sab mein chaTakte aae

fasl-e-gul ho ki ḳhizāñ sab meñ chaTakte aa.e

ham har ik daur ke dāman meñ mahakte aa.e

TuuT jaanā to sitāroñ kā muqaddar Thahrā

ham chamak vaale haiñ chamkeñge chamakte aa.e

jo rivāyat hai azal se vo hai anjām apnā

ahl-e-dil vaqt kī suulī pe laTakte aa.e

kitne ilzām the ta.ane the shikāyat thī bahut

sab usī dar pe magar sar ko paTakte aa.e

ham junūñ vāloñ se kab duur thī manzil 'rāhī'

aql vaale the jo rāhoñ meñ bhaTakte aa.e

fasl-e-gul ho ki KHizan sab mein chaTakte aae

hum har ek daur ke daman mein mahakte aae

TuT jaana to sitaron ka muqaddar Thahra

hum chamak wale hain chamkenge chamakte aae

jo riwayat hai azal se wo hai anjam apna

ahl-e-dil waqt ki suli pe laTakte aae

kitne ilzam the tane the shikayat thi bahut

sab usi dar pe magar sar ko paTakte aae

hum junun walon se kab dur thi manzil 'rahi'

aql wale the jo rahon mein bhaTakte aae