fasl-e-gul KHak hui jab to sada di tu ne

fasl-e-gul ḳhaak huī jab to sadā dī tū ne

ai gul-e-tāza bahut der lagā dī tū ne

terī ḳhushbū se mire dil meñ khile dard ke phuul

so ga.ī thī jo balā phir se jagā dī tū ne

merī āñkhoñ meñ añdhere ke sivā kuchh bhī na thā

is ḳharābe meñ ye kyā sham.a jalā dī tū ne

zindagī bhar mujhe jalne ke liye chhoḌ diyā

sabz pattoñ meñ ye kyā aag lagā dī tū ne

koī sūrat bhī rihā.ī kī nahīñ rahne dī

aisī dīvār pe dīvār banā dī tū ne

maiñ tire haath na chūmūñ to ye nā-shukrī hai

daulat-e-dard tamannā se sivā dī tū ne

kabhī kah duuñ to zamāna merā dushman ho jaa.e

dil ko vo baat bhī chup rah ke batā dī tū ne

vo tire paas se chup-chāp guzar kaise gayā

dil-e-betāb qayāmat na uThā dī tū ne

ise kahne ke liye lafz kahāñ se aa.e

dāstān-e-shab-e-ġham kaise sunā dī tū ne

us ko bhī us kī nigāhoñ meñ bahut ḳhvār kiyā

apnī tauqīr bhī miTTī meñ milā dī tū ne

kaash vāpas tujhe goyā.ī na miltī 'shahzād'

bol kar aaj bahut baat baḌhā dī tū ne

fasl-e-gul KHak hui jab to sada di tu ne

ai gul-e-taza bahut der laga di tu ne

teri KHushbu se mere dil mein khile dard ke phul

so gai thi jo bala phir se jaga di tu ne

meri aankhon mein andhere ke siwa kuchh bhi na tha

is KHarabe mein ye kya shama jala di tu ne

zindagi bhar mujhe jalne ke liye chhoD diya

sabz patton mein ye kya aag laga di tu ne

koi surat bhi rihai ki nahin rahne di

aisi diwar pe diwar bana di tu ne

main tere hath na chumun to ye na-shukri hai

daulat-e-dard tamanna se siwa di tu ne

kabhi kah dun to zamana mera dushman ho jae

dil ko wo baat bhi chup rah ke bata di tu ne

wo tere pas se chup-chap guzar kaise gaya

dil-e-betab qayamat na uTha di tu ne

ise kahne ke liye lafz kahan se aae

dastan-e-shab-e-gham kaise suna di tu ne

us ko bhi us ki nigahon mein bahut KHwar kiya

apni tauqir bhi miTTi mein mila di tu ne

kash wapas tujhe goyai na milti 'shahzad'

bol kar aaj bahut baat baDha di tu ne