fasl-e-gul mein meri wahshat ke hain saman kitne

fasl-e-gul meñ mirī vahshat ke haiñ sāmāñ kitne

purze-purze nazar aate haiñ garebāñ kitne

kyā kahūñ dard-e-mohabbat ke haiñ ehsāñ kitne

aaj tum ho ga.e nazdīk-e-rag-e-jāñ kitne

aaj hañste hue vo ruḳh se ulaTte haiñ naqāb

aaj ḳhatre meñ nazar aate haiñ īmāñ kitne

ik nasheman ke liye phuñk gayā saarā māhaul

nigah-e-barq ke gulshan pe haiñ ehsāñ kitne

ham gunahgār-e-gulistāñ haiñ hameñ kyā ma.alūm

luT ga.e ain bahāroñ meñ gulistāñ kitne

ḳhanda-e-gul kī qasam girya-e-shabnam kī qasam

mausam-e-gul meñ bhī haiñ be-sar-o-sāmāñ kitne

mauj-dar-mauj talātum hai ḳhudā ḳhair kare

ik safīna ke liye uTThe haiñ tūfāñ kitne

dard-e-dil dard-e-jigar sub.h-e-alam shām-e-firāq

ek afsāne se paidā hue unvāñ kitne

muskurā kar kahīñ tum ne mujhe dekhā to nahīñ

rah ga.e dil meñ taḌapte hue armāñ kitne

mai-kada meñ nazar aa.e jo mujhe pahle-pahal

shaiḳh sāhab hue hairān-o-pareshāñ kitne

tū ne aaj ai nigah-e-shauq ye dekhā hī nahīñ

un kī palkoñ pe sitāre se haiñ raqsāñ kitne

jāda-e-dard-e-mohabbat meñ bhaTak kar ai dost

ik tire naam pe haiñ dast-o-garebāñ kitne

mujh se sīkhe koī sajdoñ kā salīqa 'sājid'

ho ga.e naqsh-e-qadam un ke numāyāñ kitne

fasl-e-gul mein meri wahshat ke hain saman kitne

purze-purze nazar aate hain gareban kitne

kya kahun dard-e-mohabbat ke hain ehsan kitne

aaj tum ho gae nazdik-e-rag-e-jaan kitne

aaj hanste hue wo ruKH se ulaTte hain naqab

aaj KHatre mein nazar aate hain iman kitne

ek nasheman ke liye phunk gaya sara mahaul

nigah-e-barq ke gulshan pe hain ehsan kitne

hum gunahgar-e-gulistan hain hamein kya malum

luT gae ain bahaaron mein gulistan kitne

KHanda-e-gul ki qasam girya-e-shabnam ki qasam

mausam-e-gul mein bhi hain be-sar-o-saman kitne

mauj-dar-mauj talatum hai KHuda KHair kare

ek safina ke liye uTThe hain tufan kitne

dard-e-dil dard-e-jigar subh-e-alam sham-e-firaq

ek afsane se paida hue unwan kitne

muskura kar kahin tum ne mujhe dekha to nahin

rah gae dil mein taDapte hue arman kitne

mai-kada mein nazar aae jo mujhe pahle-pahal

shaiKH sahab hue hairan-o-pareshan kitne

tu ne aaj ai nigah-e-shauq ye dekha hi nahin

un ki palkon pe sitare se hain raqsan kitne

jada-e-dard-e-mohabbat mein bhaTak kar ai dost

ek tere nam pe hain dast-o-gareban kitne

mujh se sikhe koi sajdon ka saliqa 'sajid'

ho gae naqsh-e-qadam un ke numayan kitne