fasl-e-gul mein nain baghule uThte viranon ke beach

fasl-e-gul meñ na.iiñ baghūle uThte vīrānoñ ke beach

ḳhaak dīvānoñ kī vajdī hai bayābānoñ ke beach

vo jalā majnūñ ke dil kā ko.elā aatī thī phūñk

varna laila kaahe ko jaatī bayābānoñ ke beach

jaise girheñ de koī zunnār kā sub.ha banā.e

pur hai kufr-e-ishq tyuuñ īmān ke dānoñ ke beach

pur haiñ mushk-e-tīr-baḳhtī se mirī sab dil ke ghaav

jis tarah laTke hai zulf-e-dil-barāñ shānoñ ke beach

ruuh merī bhī nahīñ chhoḌegī rañg-e-sair-e-bāġh

juuñ bharī rahtī hai bū-e-gul gulistānoñ ke beach

fasl-e-gul aa.ī ki zanjīroñ ke sar par naale kar

naach uThe dīvāne dastak de ke zindānoñ ke beach

laal ho ishrat se juuñ gul hañs uThe haiñ mere gosh

yaar ke aane kī juuñ pahuñchī ḳhabar kānoñ ke beach

har suḳhan ko faḳhr hai 'uzlat' tavajjoh se mirī

huuñ imām-e-vaqt dillī ke suḳhan-dānoñ ke beach

fasl-e-gul mein nain baghule uThte viranon ke beach

KHak diwanon ki wajdi hai bayabanon ke beach

wo jala majnun ke dil ka koela aati thi phunk

warna laila kahe ko jati bayabanon ke beach

jaise girhen de koi zunnar ka subha banae

pur hai kufr-e-ishq tyun iman ke danon ke beach

pur hain mushk-e-tir-baKHti se meri sab dil ke ghaw

jis tarah laTke hai zulf-e-dil-baran shanon ke beach

ruh meri bhi nahin chhoDegi rang-e-sair-e-bagh

jun bhari rahti hai bu-e-gul gulistanon ke beach

fasl-e-gul aai ki zanjiron ke sar par nale kar

nach uThe diwane dastak de ke zindanon ke beach

lal ho ishrat se jun gul hans uThe hain mere gosh

yar ke aane ki jun pahunchi KHabar kanon ke beach

har suKHan ko faKHr hai 'uzlat' tawajjoh se meri

hun imam-e-waqt dilli ke suKHan-danon ke beach