fasl-e-gul sare gulistan ko nikhaar aai hai

fasl-e-gul saare gulistāñ ko nikhār aa.ī hai

phuul to phuul haiñ kāñToñ pe bahār aa.ī hai

surḳh Dore tirī āñkhoñ ke haiñ ġhammāz sanam

kah diyā shab kā fasāna jo guzār aa.ī hai

aa.ī tahzīb na.ī to yahī ma.alūm huā

ruḳh-e-māzī se naqāboñ ko utaar aa.ī hai

chāñd tāroñ se sajī merī shab-e-ġham dekho

nuur ke Dole pe yādoñ kī bahār aa.ī hai

tīrgī aaj shab-e-ġham kī miTāne ke liye

merī palkoñ pe sitāroñ kī qatār aa.ī hai

jab huā un ko yaqīñ maiñ huā ġharqāb-e-vafā

tab sahāre ke liye un kī pukār aa.ī hai

mirī sāñsoñ meñ basī phir vahī ḳhushbū 'monis'

kyā sabā gesū-e-mahbūb sañvār aa.ī hai

fasl-e-gul sare gulistan ko nikhaar aai hai

phul to phul hain kanTon pe bahaar aai hai

surKH Dore teri aankhon ke hain ghammaz sanam

kah diya shab ka fasana jo guzar aai hai

aai tahzib nai to yahi malum hua

ruKH-e-mazi se naqabon ko utar aai hai

chand taron se saji meri shab-e-gham dekho

nur ke Dole pe yaadon ki bahaar aai hai

tirgi aaj shab-e-gham ki miTane ke liye

meri palkon pe sitaron ki qatar aai hai

jab hua un ko yaqin main hua gharqab-e-wafa

tab sahaare ke liye un ki pukar aai hai

meri sanson mein basi phir wahi KHushbu 'monis'

kya saba gesu-e-mahbub sanwar aai hai