fasurda aashiyane mein parinde chahchahane se

fasurda āshiyāne meñ parinde chahchahāne se

shajar kā rang badlā thā havā ke sarsarāne se

vo lamha shaam kā thā aur ufuq ke niile āñgan meñ

shafaq jalne lagī ḳhurshīd kī mash'al bujhāne se

damakte jugnuoñ ke raqs se mā'lūm hotā hai

zamīñ ḳhush-hāl rahtī hai na.e paude lagāne se

vo motī dekh kar jis ko zamāna dang rah jaa.e

kabhī maiñ DhūñD lā.ūñgā samundar ke ḳhazāne se

ghanā sannāTā chhāyā thā mire ḳhvāboñ ke jangal meñ

tilism-e-ḳhāmushī TuuTā kisī ke gungunāne se

barahna peḌ ko shāyad sukūt-e-hijr meñ 'rāshid'

bahār āvāz detī thī ḳhizāñ ke shāmiyāne se

fasurda aashiyane mein parinde chahchahane se

shajar ka rang badla tha hawa ke sarsarane se

wo lamha sham ka tha aur ufuq ke nile aangan mein

shafaq jalne lagi KHurshid ki mash'al bujhane se

damakte jugnuon ke raqs se ma'lum hota hai

zamin KHush-haal rahti hai nae paude lagane se

wo moti dekh kar jis ko zamana dang rah jae

kabhi main DhunD launga samundar ke KHazane se

ghana sannaTa chhaya tha mere KHwabon ke jangal mein

tilism-e-KHamushi TuTa kisi ke gungunane se

barahna peD ko shayad sukut-e-hijr mein 'rashid'

bahaar aawaz deti thi KHizan ke shamiyane se