fauran sipah-e-shum ki lalkar band ho

fauran sipāh-e-shūm kī lalkār band ho

yūñhī alaf jalāl se merā samand ho

apne hī dil pe jab mirā qaabū nahīñ rahā

kaise kisī jahān pe merī kamand ho

tere navāh meñ ka.ī kachche makān haiñ

itnā na sat.h-e-āb se dariyā buland ho

insāniyat vujūd ke jauhar kā naam hai

so aañkh nam na ho bhī to dil dard-mand ho

uktā gayā huuñ dekh ke hamvār zindagī

jī chāhtā hai ab kahīñ past-o-buland ho

kartā nahīñ kisī ke sahāre pe inhisār

jis shaḳhs kā mizāj haqīqat-pasand ho

chaltā huuñ maiñ bhī saath mu'āfī ke vāste

mumkin hai merī zaat se pohñchā gazand ho

tab tak kisī ke 'ishq kā dā'vā daroġh hai

jab tak jigar na soḳhtagī se sipand ho

merā nishān kaun-o-makāñ DhūñDte phireñ

aisī hudūd-e-jism se bāhar zaqand ho

fauran sipah-e-shum ki lalkar band ho

yunhi alaf jalal se mera samand ho

apne hi dil pe jab mera qabu nahin raha

kaise kisi jahan pe meri kamand ho

tere nawah mein kai kachche makan hain

itna na sath-e-ab se dariya buland ho

insaniyat wujud ke jauhar ka nam hai

so aankh nam na ho bhi to dil dard-mand ho

ukta gaya hun dekh ke hamwar zindagi

ji chahta hai ab kahin past-o-buland ho

karta nahin kisi ke sahaare pe inhisar

jis shaKHs ka mizaj haqiqat-pasand ho

chalta hun main bhi sath mu'afi ke waste

mumkin hai meri zat se pohncha gazand ho

tab tak kisi ke 'ishq ka da'wa darogh hai

jab tak jigar na soKHtagi se sipand ho

mera nishan kaun-o-makan DhunDte phiren

aisi hudud-e-jism se bahar zaqand ho