faza bhi girwi paDi bahr-o-bar bhi girwi hain

fazā bhī girvī paḌī bahr-o-bar bhī girvī haiñ

ye sar uThā.eñ to kaise ki sar bhī girvī haiñ

hamāre haañ jo paḌā hai hamārā kuchh bhī nahīñ

hamāre haañ to parindoñ ke par bhī girvī haiñ

hamārā da.avā hai ham zinda qaum haiñ lekin

hamārī fasleñ zamīneñ ye ghar bhī girvī haiñ

maiñ apnī marzī se ye moḌ kāTtā huuñ kahāñ

safar bhī girvī mire ham-safar bhī girvī haiñ

mire nahīñ ye mujhe chāroñ mausamoñ kī qasam

mire shajar mire barg-o-samar bhī girvī haiñ

mujhe sitāroñ kī sargoshiyāñ batātī haiñ

ye āsmān ye shams-o-qamar bhī girvī haiñ

kisī ko khul ke ijāzat nahīñ hai kahne kī

hamāre shahr ke sab dīda-var bhī girvī haiñ

huzūr ham haiñ na.ī khep vo ġhulāmoñ kī

pidar bhī girvī paḌe haiñ pisar bhī girvī haiñ

hamāre sho.ala-o-shabnam bhī ab hamāre nahīñ

hamāre sarv saman kyā sharar bhī girvī haiñ

ba-taur-e-ḳhās hameñ jānvar samajhtā hai

so us kī nazroñ meñ ham jānvar bhī girvī haiñ

hamāre aiboñ kī gaThrī to roz kholte ho

tumhāre paas hamāre hunar bhī girvī haiñ

ḳhushī ġhamī kā bhī iz.hār kar nahīñ sakte

hamāre naġhma-gar-o-nauha-gar bhī girvī haiñ

faza bhi girwi paDi bahr-o-bar bhi girwi hain

ye sar uThaen to kaise ki sar bhi girwi hain

hamare han jo paDa hai hamara kuchh bhi nahin

hamare han to parindon ke par bhi girwi hain

hamara dawa hai hum zinda qaum hain lekin

hamari faslen zaminen ye ghar bhi girwi hain

main apni marzi se ye moD kaTta hun kahan

safar bhi girwi mere ham-safar bhi girwi hain

mere nahin ye mujhe chaaron mausamon ki qasam

mere shajar mere barg-o-samar bhi girwi hain

mujhe sitaron ki sargoshiyan batati hain

ye aasman ye shams-o-qamar bhi girwi hain

kisi ko khul ke ijazat nahin hai kahne ki

hamare shahr ke sab dida-war bhi girwi hain

huzur hum hain nai khep wo ghulamon ki

pidar bhi girwi paDe hain pisar bhi girwi hain

hamare shoala-o-shabnam bhi ab hamare nahin

hamare sarw saman kya sharar bhi girwi hain

ba-taur-e-KHas hamein jaanwar samajhta hai

so us ki nazron mein hum jaanwar bhi girwi hain

hamare aibon ki gaThri to roz kholte ho

tumhaare pas hamare hunar bhi girwi hain

KHushi ghami ka bhi izhaar kar nahin sakte

hamare naghma-gar-o-nauha-gar bhi girwi hain