faza-e-barq kya raqs-e-sharar kya

fazā-e-barq kyā raqs-e-sharar kyā

karishmoñ se laḌe un kī nazar kyā

ḳhayāl-e-hūr-o-kausar se hai badmast

ġham-e-dīñ kī ho vaa.iz ko ḳhabar kyā

rahegī hashr meñ yād-e-mai-o-jām

kiyā hai aur ham ne umr bhar kyā

talāsh-e-dard hai ahl-e-havas ko

kashish hai khel biktā hai asar kyā

bane haiñ tār-e-dāman ḳhār-e-dāman

lagā.e haath in ko baḳhiya-gar kyā

anal-haq par abas hai shor-e-bejā

na thā yazdāñ kī sūrat meñ bashar kyā

na ho mizhgāñ ko jumbish ye guzar jaa.e

hayāt-e-aish bhī hai muḳhtasar kyā

gire the phuul kuchh sham-e-lahad ke

uḌā kar le ga.ī bād-e-sahar kyā

vo dāman ho to rone kā maza hai

dikhā.e josh-e-tūfāñ chashm-e-tar kyā

banā rakkhā hai dīvāna kisī ko

tumhāre husn meñ hai ye asar kyā

harīf-e-rabt hai rusvā.ī-e-shauq

ye hañs kar kah gayā paiġhāmbar kyā

rahūñ mahrūm-e-zauq-e-marg-e-ulfat

mujhe tū kostā hai chārāgar kyā

rahe jis dil meñ soz-e-ġham vo dil hai

rahe jis ghar meñ tārīkī vo ghar kyā

junūn-e-ishq hai ik chiiz nāseh

tujhe samjhā.eñ ham āshufta-sar kyā

mohabbat meñ hai dil kā aa.ina dil

tamannā.eñ idhar se hoñ udhar kyā

suḳhan-parvar hai daur-e-nā-shanāsī

sabaq-āmoz ho arz-e-hunar kyā

tamāshā-gāh-e-hasrat chashm-o-dil haiñ

tajallī munhasir hai tuur par kyā

khulā ye bhī sharīk-e-jām thā yaar

huī ḳhalvat kī tauba parda-dar kyā

raqam lo pīr-e-mai-ḳhāna se 'nāzish'

tumheñ darpesh hai hajj-e-safar kyā

faza-e-barq kya raqs-e-sharar kya

karishmon se laDe un ki nazar kya

KHayal-e-hur-o-kausar se hai badmast

gham-e-din ki ho waiz ko KHabar kya

rahegi hashr mein yaad-e-mai-o-jam

kiya hai aur hum ne umr bhar kya

talash-e-dard hai ahl-e-hawas ko

kashish hai khel bikta hai asar kya

bane hain tar-e-daman KHar-e-daman

lagae hath in ko baKHiya-gar kya

anal-haq par abas hai shor-e-beja

na tha yazdan ki surat mein bashar kya

na ho mizhgan ko jumbish ye guzar jae

hayat-e-aish bhi hai muKHtasar kya

gire the phul kuchh sham-e-lahad ke

uDa kar le gai baad-e-sahar kya

wo daman ho to rone ka maza hai

dikhae josh-e-tufan chashm-e-tar kya

bana rakkha hai diwana kisi ko

tumhaare husn mein hai ye asar kya

harif-e-rabt hai ruswai-e-shauq

ye hans kar kah gaya paighambar kya

rahun mahrum-e-zauq-e-marg-e-ulfat

mujhe tu kosta hai chaaragar kya

rahe jis dil mein soz-e-gham wo dil hai

rahe jis ghar mein tariki wo ghar kya

junun-e-ishq hai ek chiz naseh

tujhe samjhaen hum aashufta-sar kya

mohabbat mein hai dil ka aaina dil

tamannaen idhar se hon udhar kya

suKHan-parwar hai daur-e-na-shanasi

sabaq-amoz ho arz-e-hunar kya

tamasha-gah-e-hasrat chashm-o-dil hain

tajalli munhasir hai tur par kya

khula ye bhi sharik-e-jam tha yar

hui KHalwat ki tauba parda-dar kya

raqam lo pir-e-mai-KHana se 'nazish'

tumhein darpesh hai hajj-e-safar kya