faza-e-gulsitan se dil agar begana ho jae

fazā-e-gulsitāñ se dil agar begāna ho jaa.e

har ik gul ḳhaar sā khanke chaman vīrāna ho jaa.e

idhar aao batā.ūñ maiñ tumheñ dīvāngī kyā hai

jise dīvāna kah do tum vahī dīvāna ho jaa.e

havā.eñ nāchtī aa.iiñ fazā.eñ jhūmtī aa.iiñ

adā phir aaj saaqī sunnat-e-mai-ḳhāna ho jaa.e

tumhīñ insāf se kah do ma.āl-e-ishq kyā hogā

harīf-e-naqsh-e-pā gar sajda-e-shukrāna ho jaa.e

mujhe saaqī pilā yuuñ mai-kada-bar-dosh āñkhoñ se

nazar jis shai pe Dālūñ maiñ vahī paimāna ho jaa.e

karam-parvar nazar se tum kabhī dekho agar mujh ko

mukammal zindagī kā nau-ba-nau afsāna ho jaa.e

bane shāgird 'āshiq' jaunpūrī kā agar koī

yaqīñ 'muḳhtār' hai vo shā.ir-e-farzāna ho jaa.e

faza-e-gulsitan se dil agar begana ho jae

har ek gul KHar sa khanke chaman virana ho jae

idhar aao bataun main tumhein diwangi kya hai

jise diwana kah do tum wahi diwana ho jae

hawaen nachti aain fazaen jhumti aain

ada phir aaj saqi sunnat-e-mai-KHana ho jae

tumhin insaf se kah do maal-e-ishq kya hoga

harif-e-naqsh-e-pa gar sajda-e-shukrana ho jae

mujhe saqi pila yun mai-kada-bar-dosh aankhon se

nazar jis shai pe Dalun main wahi paimana ho jae

karam-parwar nazar se tum kabhi dekho agar mujh ko

mukammal zindagi ka nau-ba-nau afsana ho jae

bane shagird 'ashiq' jaunpuri ka agar koi

yaqin 'muKHtar' hai wo shair-e-farzana ho jae