faza mein rang se bikhre hain chandni hui hai

fazā meñ rañg se bikhre haiñ chāñdnī huī hai

kisī sitāre kī titlī se dostī huī hai

mirī tamām riyāzat kā ek hāsil hai

vahī duā jo tere naam se juḌī huī hai

maiñ hādse se nikal aa.ī huuñ magar dekho

zamīn ab bhī mire jism par paḌī huī hai

abhī to tū ne mirā haath bhī nahīñ thāmā

ye kis ḳhabar se zamāne meñ sansanī huī hai

udāsī joñk hai ye ḳhuun chuus letī hai

ye baat maiñ ne kahīñ aur bhī sunī huī hai

maiñ tere lams ke jaadū se ḳhuub vāqif huuñ

vo shāḳh huuñ jo tire haath par harī huī hai

jo āñkheñ señk rahe haiñ unheñ ḳhabar hī nahīñ

yahāñ pe ḳhvāb jale haiñ to raushnī huī hai

maiñ laal rañg lagātī thī niile ḳhvāboñ ko

isī liye to ye ta.abīr kāsnī huī hai

vo mere baare meñ kyā sochtā hai kyā ma.alūm

ḳhudā se merī mulāqāt sarsarī huī hai

maiñ pichhle saal kī tasvīr bhej detī tujhe

magar ye ek taraf se zarā jalī huī hai

mazā to jab hai ki 'injīl' hī lage sab ko

nuzūl-e-ishq pe jitnī bhī shā.irī huī hai

faza mein rang se bikhre hain chandni hui hai

kisi sitare ki titli se dosti hui hai

meri tamam riyazat ka ek hasil hai

wahi dua jo tere nam se juDi hui hai

main hadse se nikal aai hun magar dekho

zamin ab bhi mere jism par paDi hui hai

abhi to tu ne mera hath bhi nahin thama

ye kis KHabar se zamane mein sansani hui hai

udasi jonk hai ye KHun chus leti hai

ye baat main ne kahin aur bhi suni hui hai

main tere lams ke jadu se KHub waqif hun

wo shaKH hun jo tere hath par hari hui hai

jo aankhen senk rahe hain unhen KHabar hi nahin

yahan pe KHwab jale hain to raushni hui hai

main lal rang lagati thi nile KHwabon ko

isi liye to ye tabir kasni hui hai

wo mere bare mein kya sochta hai kya malum

KHuda se meri mulaqat sarsari hui hai

main pichhle sal ki taswir bhej deti tujhe

magar ye ek taraf se zara jali hui hai

maza to jab hai ki 'injil' hi lage sab ko

nuzul-e-ishq pe jitni bhi shairi hui hai