faza mein zahr ghola humne KHud ab dam nikalta hai

fazā meñ zahr gholā ham ne ḳhud ab dam nikaltā hai

ajal kā pairahan oḌhe har ik mausam nikaltā hai

bhaTakte kyoñ haiñ marham ke liye ham dasht-o-sahrā meñ

hamāre zaḳhm ke andar hī se marham nikaltā hai

hamāre jism ke andar base haiñ saikḌoñ 'ālam

har ik 'ālam ke andar ik nayā 'ālam nikaltā hai

hamārī kāmrānī ne kiyā sūraj ko bhī zaḳhmī

ki ik saaya hamāre jism se pur-ḳham nikaltā hai

hamāre qalb ke andar bahut hī paak jazbe haiñ

kabhī gañgotarī niklī kabhī zamzam nikaltā hai

tabassum se kisī kā karb kyā jaane bhalā duniyā

ki sho'loñ kā samundar bhī pas-e-shabnam nikaltā hai

ye duniyā jis kī ḳhātir bhāgtā phirtā hai ye insāñ

to phir kyoñ batn-e-mādar se ba-chashm-e-nam nikaltā hai

jalāyā hai bahut hī ātish-e-afkār ne is ko

ki aañsū bhī hamārī āñkhoñ se pur-nam nikaltā hai

taḌap kar aag ugaltī hai zamīñ apne dahāne se

to kartā abr bhī ab girya-o-mātam nikaltā hai

zamāna kyā bhalā 'tauqīr' jaane dūsre kā ġham

use mā'lūm hotā hai ki jis kā dam nikaltā hai

faza mein zahr ghola hum ne KHud ab dam nikalta hai

ajal ka pairahan oDhe har ek mausam nikalta hai

bhaTakte kyon hain marham ke liye hum dasht-o-sahra mein

hamare zaKHm ke andar hi se marham nikalta hai

hamare jism ke andar base hain saikDon 'alam

har ek 'alam ke andar ek naya 'alam nikalta hai

hamari kaamrani ne kiya suraj ko bhi zaKHmi

ki ek saya hamare jism se pur-KHam nikalta hai

hamare qalb ke andar bahut hi pak jazbe hain

kabhi gangotari nikli kabhi zamzam nikalta hai

tabassum se kisi ka karb kya jaane bhala duniya

ki sho'lon ka samundar bhi pas-e-shabnam nikalta hai

ye duniya jis ki KHatir bhagta phirta hai ye insan

to phir kyon batn-e-madar se ba-chashm-e-nam nikalta hai

jalaya hai bahut hi aatish-e-afkar ne is ko

ki aansu bhi hamari aankhon se pur-nam nikalta hai

taDap kar aag ugalti hai zamin apne dahane se

to karta abr bhi ab girya-o-matam nikalta hai

zamana kya bhala 'tauqir' jaane dusre ka gham

use ma'lum hota hai ki jis ka dam nikalta hai