fazaen is qadar be-kal rahi hain

fazā.eñ is qadar be-kal rahī haiñ

ye āñkheñ raat bhar jal-thal rahī haiñ

dabe paañv mirī tanhā.iyoñ meñ

havā.eñ ḳhvāb ban kar chal rahī haiñ

sahar-dam sohbat-e-rafta kī yādeñ

mire pahlū meñ āñkheñ mal rahī haiñ

tirā ġham kākuleñ khole hue hai

mire siine meñ shāmeñ Dhal rahī haiñ

añdheroñ meñ kamī kyā hogī lekin

ye sham.eñ shaam hī se jal rahī haiñ

'ziyā' in sā.atoñ meñ kho ga.e ham

khulī āñkhoñ se jo ojhal rahī haiñ

fazaen is qadar be-kal rahi hain

ye aankhen raat bhar jal-thal rahi hain

dabe panw meri tanhaiyon mein

hawaen KHwab ban kar chal rahi hain

sahar-dam sohbat-e-rafta ki yaaden

mere pahlu mein aankhen mal rahi hain

tera gham kakulen khole hue hai

mere sine mein shamen Dhal rahi hain

andheron mein kami kya hogi lekin

ye shamen sham hi se jal rahi hain

'ziya' in saaton mein kho gae hum

khuli aankhon se jo ojhal rahi hain