fikr-e-asbab-e-tarab gham ke muqabil ho gaya

fikr-e-asbāb-e-tarab ġham ke muqābil ho gayā

kulfat-e-sabr-āzmā kyūñkar mirā dil ho gayā

ye jo hastī hai tirī ye hasti-e-mauhūm hai

dekh kar duniyā kī nairangī ko ġhāfil ho gayā

ho ga.ī mushtāq lazzat-hā-e-hasrat merī aañkh

aur kān-e-nā-umīdī haif ye dil ho gayā

tere jalvoñ kī tamanna mere āñkhoñ ko rahī

ik nishāna ālam-e-hairat kā ye dil ho gayā

thī matā.a-e-jalva arzāñ jabki tū thā jalva-gar

jab ḳhayāl-e-ġhair aayā dil bhī ġhāfil ho gayā

joshish-e-fasl-e-bahārī thī javānī yaar kī

dekh kar maiñ us gul-e-ra.anā ko maa.il ho gayā

kis tarah jalva nazar aa.egā tujh ko ai kalīm

darmiyāñ meñ jab hijāb-e-ġhair haa.il ho gayā

mudda.ā mahv-e-tamāshā-e-shikast-e-dil huā

ā.īna-ḳhāne kā ik jalva muqābil ho gayā

Duub kar girdāb-e-ġham meñ ho ga.ī hāsil najāt

mauja-e-sailāb-e-tūfāñ mujh ko sāhil ho gayā

partav-e-ḳhurshīd-e-ālam-tāb idhar bhī ik nazar

der kyā hai ab to maiñ tere muqābil ho gayā

hai mirā sar zer-e-bār-e-minnat-e-bedād-e-yār

us ke altāf-o-ināyat kā maiñ qaa.el ho gayā

apnī sūrat hī nazar aa.ī duī kā zikr kyā

'shād' jis dam aa.ine ke maiñ muqābil ho gayā

fikr-e-asbab-e-tarab gham ke muqabil ho gaya

kulfat-e-sabr-azma kyunkar mera dil ho gaya

ye jo hasti hai teri ye hasti-e-mauhum hai

dekh kar duniya ki nairangi ko ghafil ho gaya

ho gai mushtaq lazzat-ha-e-hasrat meri aankh

aur kan-e-na-umidi haif ye dil ho gaya

tere jalwon ki tamanna mere aankhon ko rahi

ek nishana aalam-e-hairat ka ye dil ho gaya

thi mataa-e-jalwa arzan jabki tu tha jalwa-gar

jab KHayal-e-ghair aaya dil bhi ghafil ho gaya

joshish-e-fasl-e-bahaari thi jawani yar ki

dekh kar main us gul-e-rana ko mail ho gaya

kis tarah jalwa nazar aaega tujh ko ai kalim

darmiyan mein jab hijab-e-ghair hail ho gaya

muddaa mahw-e-tamasha-e-shikast-e-dil hua

aaina-KHane ka ek jalwa muqabil ho gaya

Dub kar girdab-e-gham mein ho gai hasil najat

mauja-e-sailab-e-tufan mujh ko sahil ho gaya

partaw-e-KHurshid-e-alam-tab idhar bhi ek nazar

der kya hai ab to main tere muqabil ho gaya

hai mera sar zer-e-bar-e-minnat-e-bedad-e-yar

us ke altaf-o-inayat ka main qael ho gaya

apni surat hi nazar aai dui ka zikr kya

'shad' jis dam aaine ke main muqabil ho gaya