fikr-e-baalida ki nudrat se nikharte hain KHayal

fikr-e-bālīda kī nudrat se nikharte haiñ ḳhayāl

aur agar zehn-e-rasā ho to sañvarte haiñ ḳhayāl

aql kab kartī hai farsūda ḳhayāloñ ko qubūl

fikr bedār agar ho to ubharte haiñ ḳhayāl

jiddat-e-fikr se afkār ko miltī hai numū

husn-e-kirdār kī rāhoñ se guzarte haiñ ḳhayāl

zehn ḳhāliq hai ḳhayālāt kā taslīm magar

zehn par sūrat-e-ilhām utarte haiñ ḳhayāl

sohbat iqbāl kī afkār ko detī hai jilā

un kī sohbat meñ bahut ḳhuub nikharte haiñ ḳhayāl

muntashir zehn agar ho to natīja mālūm

sūrat-e-kāh havāoñ meñ bikharte haiñ ḳhayāl

zehn ko fikr kī tahrīk jo mil jaa.e 'qamar'

mahsharistān kī sūrat meñ guzarte haiñ ḳhayāl

fikr-e-baalida ki nudrat se nikharte hain KHayal

aur agar zehn-e-rasa ho to sanwarte hain KHayal

aql kab karti hai farsuda KHayalon ko qubul

fikr bedar agar ho to ubharte hain KHayal

jiddat-e-fikr se afkar ko milti hai numu

husn-e-kirdar ki rahon se guzarte hain KHayal

zehn KHaliq hai KHayalat ka taslim magar

zehn par surat-e-ilham utarte hain KHayal

sohbat iqbaal ki afkar ko deti hai jila

un ki sohbat mein bahut KHub nikharte hain KHayal

muntashir zehn agar ho to natija malum

surat-e-kah hawaon mein bikharte hain KHayal

zehn ko fikr ki tahrik jo mil jae 'qamar'

mahsharistan ki surat mein guzarte hain KHayal