fikr-e-dauran mein na hasti ko miTate yaro

fikr-e-daurāñ meñ na hastī ko miTāte yaaro

bazm-e-duniyā meñ maze kuchh to uThāte yaaro

mushkileñ aisī nahīñ thiiñ ki na aa sakte tum

va.ada aane kā kiyā thā to nibhāte yaaro

kār-e-duniyā se ye maanā ki pareshāñ ho bahut

ham se milne ke bahāne bhī banāte yaaro

duurī ho jaatī hai aksar yūñhī anjāne meñ

duur rah kar mirā yuuñ dil na dukhāte yaaro

jaise aate the kabhī aa ke mirī duniyā meñ

merī ujḌī huī bastī ko basāte yaaro

kis ko parvā hai mile kaun kahāñ kab kis se

ḳhauf-e-duniyā se na yuuñ ḳhud ko Darāte yaaro

phir se āġhāz-e-mohabbat nahīñ āsāñ itnā

apnī derīna mohabbat ko nibhāte yaaro

paas aate mire ik baar ba-sad-nāz-o-adā

ik jhalak apnī mujhe aa ke dikhāte yaaro

fikr-e-dauran mein na hasti ko miTate yaro

bazm-e-duniya mein maze kuchh to uThate yaro

mushkilen aisi nahin thin ki na aa sakte tum

wada aane ka kiya tha to nibhate yaro

kar-e-duniya se ye mana ki pareshan ho bahut

hum se milne ke bahane bhi banate yaro

duri ho jati hai aksar yunhi anjaane mein

dur rah kar mera yun dil na dukhate yaro

jaise aate the kabhi aa ke meri duniya mein

meri ujDi hui basti ko basate yaro

kis ko parwa hai mile kaun kahan kab kis se

KHauf-e-duniya se na yun KHud ko Daraate yaro

phir se aaghaz-e-mohabbat nahin aasan itna

apni derina mohabbat ko nibhate yaro

pas aate mere ek bar ba-sad-naz-o-ada

ek jhalak apni mujhe aa ke dikhate yaro