fikr-e-jahan rahegi gham-e-yar agar nahin

fikr-e-jahāñ rahegī ġham-e-yār agar nahīñ

yā'nī kisī kā dard se ḳhālī jigar nahīñ

maanā ki rakh sakā na kabhī maiñ tirā ḳhayāl

lekin ḳhud apnī zaat kī mujh ko ḳhabar nahīñ

qaa.il har ek shaḳhs hai mere kalām kā

us par kisī bhī baat kā lekin asar nahīñ

sahrā-navardiyoñ kī ijāzat zarūr hai

lekin chaman meñ ahl-e-junūñ kā guzar nahīñ

ḳhatroñ se Darne vaale abhī saath chhoḌ deñ

āsān is qadar bhī hamārā safar nahīñ

jaltā hai tere husn se ye māhtāb bhī

terā asar jahān meñ kis chiiz par nahīñ

dīvār-o-dar se bhī tirī yādeñ haiñ munsalik

yā'nī ki terī zaat se koī mafar nahīñ

'afzal' khuleñge mā'nī-e-ash'ār kab talak

kyā in samundaroñ meñ sadaf aur guhar nahīñ

fikr-e-jahan rahegi gham-e-yar agar nahin

ya'ni kisi ka dard se KHali jigar nahin

mana ki rakh saka na kabhi main tera KHayal

lekin KHud apni zat ki mujh ko KHabar nahin

qail har ek shaKHs hai mere kalam ka

us par kisi bhi baat ka lekin asar nahin

sahra-nawardiyon ki ijazat zarur hai

lekin chaman mein ahl-e-junun ka guzar nahin

KHatron se Darne wale abhi sath chhoD den

aasan is qadar bhi hamara safar nahin

jalta hai tere husn se ye mahtab bhi

tera asar jahan mein kis chiz par nahin

diwar-o-dar se bhi teri yaaden hain munsalik

ya'ni ki teri zat se koi mafar nahin

'afzal' khulenge ma'ni-e-ash'ar kab talak

kya in samundaron mein sadaf aur guhar nahin