fikr-e-manzil hai na nam-e-rahnuma lete hain hum

fikr-e-manzil hai na nām-e-rahnumā lete haiñ ham

apnā zauq-e-rah-ravī ḳhud aazmā lete haiñ ham

kasrat-e-ġham meñ bhī aksar muskurā lete haiñ ham

zulmat-e-hastī meñ yuuñ sham.eñ jalā lete haiñ ham

kuchh na pūchho himmatoñ se kaam kyā lete haiñ ham

ġham ko baada dil ko paimāna banā lete haiñ ham

muntashir hone ko aatī hai jo bazm-e-ārzū

hausloñ kī phir na.ī mahfil sajā lete haiñ ham

qāfila aa kar sar-e-manzil bhī ho jaatā hai gum

rāhzan ko jab kabhī rahbar banā lete haiñ ham

zulm-e-daurāñ ko 'atā karnā hai taaza hausla

tiir jo aatā hai siine se lagā lete haiñ ham

kyuuñ mizāj-e-husn meñ paidā kareñ ik barhamī

apne dil ko apnā afsāna sunā lete haiñ ham

is qadar charke lage haiñ dahr meñ ai ham-nashīñ

ḳhaar kyā phūloñ se bhī dāman bachā lete haiñ ham

multafit hotā nahīñ jab sāqī-e-daurāñ 'hasan'

mai-kade meñ baḌh ke ḳhud sāġhar uThā lete haiñ ham

fikr-e-manzil hai na nam-e-rahnuma lete hain hum

apna zauq-e-rah-rawi KHud aazma lete hain hum

kasrat-e-gham mein bhi aksar muskura lete hain hum

zulmat-e-hasti mein yun shamen jala lete hain hum

kuchh na puchho himmaton se kaam kya lete hain hum

gham ko baada dil ko paimana bana lete hain hum

muntashir hone ko aati hai jo bazm-e-arzu

hauslon ki phir nai mahfil saja lete hain hum

qafila aa kar sar-e-manzil bhi ho jata hai gum

rahzan ko jab kabhi rahbar bana lete hain hum

zulm-e-dauran ko 'ata karna hai taza hausla

tir jo aata hai sine se laga lete hain hum

kyun mizaj-e-husn mein paida karen ek barhami

apne dil ko apna afsana suna lete hain hum

is qadar charke lage hain dahr mein ai ham-nashin

KHar kya phulon se bhi daman bacha lete hain hum

multafit hota nahin jab saqi-e-dauran 'hasan'

mai-kade mein baDh ke KHud saghar uTha lete hain hum