fikr ka sabza mila jazbaat ki kai mili

fikr kā sabza milā jazbāt kī kaa.ī milī

zehn ke tālāb par kyā naqsh-ārā.ī milī

mutma.in hotā kahāñ merā dil-e-jalvat-pasand

darmiyān-e-shahr bhī jañgal sī tanhā.ī milī

dekhne meñ duur se vo kis qadar saada lagā

paas se dekhā to us meñ kitnī gahrā.ī milī

har darīcha mere istiqbāl ko vā ho gayā

ajnabī galiyoñ meñ bhī mujh ko shanāsā.ī milī

jab bhī habs-e-shahr se nikle to har ik raah par

mehrbāñ ahbāb kī mānind purvā.ī milī

is se baḌh kar aur kyā hotā safar kā iḳhtitām

Dūbte sūraj se har manzar ko ra.anā.ī milī

rābtoñ kī vus.ateñ harjā.ī-pan samjhī ga.iiñ

ham ko ai 'betāb' shohrat se bhī rusvā.ī milī

fikr ka sabza mila jazbaat ki kai mili

zehn ke talab par kya naqsh-arai mili

mutmain hota kahan mera dil-e-jalwat-pasand

darmiyan-e-shahr bhi jangal si tanhai mili

dekhne mein dur se wo kis qadar sada laga

pas se dekha to us mein kitni gahrai mili

har daricha mere istiqbaal ko wa ho gaya

ajnabi galiyon mein bhi mujh ko shanasai mili

jab bhi habs-e-shahr se nikle to har ek rah par

mehrban ahbab ki manind purwai mili

is se baDh kar aur kya hota safar ka iKHtitam

Dubte suraj se har manzar ko ranai mili

rabton ki wusaten harjai-pan samjhi gain

hum ko ai 'betab' shohrat se bhi ruswai mili