firaq-e-yar ke lamhe guzar hi jaenge

firāq-e-yār ke lamhe guzar hī jā.eñge

chaḌhe hue haiñ jo dariyā utar hī jā.eñge

tamām raat dar-e-mai-kadā pe kaaTī hai

sahar qarīb hai ab apne ghar hī jā.eñge

tū mere hāl-e-pareshāñ kā kuchh ḳhayāl na kar

jo zaḳhm tū ne lagā.e haiñ bhar hī jā.eñge

miyān-dār-o-shabistān-e-yār baiThe haiñ

jidhar ishāra-e-dil ho udhar hī jā.eñge

julūs-e-nāz kabhī to idhar se guzregā

kabhī to dil ke muqaddar sañvar hī jā.eñge

yahī rahegā jo andāza-e-nā-shanāsā.ī

tumhāre chāhne vaale to mar hī jā.eñge

abhī chhiḌī bhī na thī dāstān-e-ahd-e-vafā

kise ḳhabar thī ki vo yuuñ mukar hī jā.eñge

jamāl-e-yār kī nādīda ḳhalvatoñ meñ 'zahīr'

agar ga.e to ye āshufta-sar hī jā.eñge

firaq-e-yar ke lamhe guzar hi jaenge

chaDhe hue hain jo dariya utar hi jaenge

tamam raat dar-e-mai-kada pe kaTi hai

sahar qarib hai ab apne ghar hi jaenge

tu mere haal-e-pareshan ka kuchh KHayal na kar

jo zaKHm tu ne lagae hain bhar hi jaenge

miyan-dar-o-shabistan-e-yar baiThe hain

jidhar ishaara-e-dil ho udhar hi jaenge

julus-e-naz kabhi to idhar se guzrega

kabhi to dil ke muqaddar sanwar hi jaenge

yahi rahega jo andaza-e-na-shanasai

tumhaare chahne wale to mar hi jaenge

abhi chhiDi bhi na thi dastan-e-ahd-e-wafa

kise KHabar thi ki wo yun mukar hi jaenge

jamal-e-yar ki nadida KHalwaton mein 'zahir'

agar gae to ye aashufta-sar hi jaenge