firaq-e-yar mein aisi bhi ek shab aai

firāq-e-yār meñ aisī bhī ek shab aa.ī

charāġh jal gayā āñkhoñ meñ niiñd jab aa.ī

umīd-o-bīm ke aalam meñ thī nigāh-e-shauq

kisī kī yaad mire dil meñ nīm-shab aa.ī

sahar ke baad bhī thā terā intizār mujhe

nigāh dar se har ik baar tishna-lab aa.ī

na shaġhl-e-bāda-kashī hai na shauq-e-rāmish-o-rañg

ye kis maqām par ab mahfil-e-tarab aa.ī

ḳhum-o-subū bhī haiñ labrez ab sharāboñ se

ye dekhnā hai ki rindoñ ko niiñd kab aa.ī

maiñ tere shahr meñ tujh se bhī sar-kashīda huuñ

tū mujh se milne sar-e-rāh be-sabab aa.ī

sitāre Duub ga.e aur shab tamām huī

charāġh bujh gayā āñkhoñ meñ niiñd tab aa.ī

na dil meñ mauj-e-tamannā na lab pe harf-e-vafā

ye kis ravish pe 'sabā' zindagī hai ab aa.ī

firaq-e-yar mein aisi bhi ek shab aai

charagh jal gaya aankhon mein nind jab aai

umid-o-bim ke aalam mein thi nigah-e-shauq

kisi ki yaad mere dil mein nim-shab aai

sahar ke baad bhi tha tera intizar mujhe

nigah dar se har ek bar tishna-lab aai

na shaghl-e-baada-kashi hai na shauq-e-ramish-o-rang

ye kis maqam par ab mahfil-e-tarab aai

KHum-o-subu bhi hain labrez ab sharabon se

ye dekhna hai ki rindon ko nind kab aai

main tere shahr mein tujh se bhi sar-kashida hun

tu mujh se milne sar-e-rah be-sabab aai

sitare Dub gae aur shab tamam hui

charagh bujh gaya aankhon mein nind tab aai

na dil mein mauj-e-tamanna na lab pe harf-e-wafa

ye kis rawish pe 'saba' zindagi hai ab aai