firqa-kashi ka koi bhi matlab dikhaiye

firqa-kashī kā koī bhī matlab dikhā.iye

ġhārat-garoñ kā ek hī maz.hab dikhā.iye

millī haqīqatoñ pe hai pardā paḌā huā

fikr-o-nazar kā aap hī kaukab dikhā.iye

qadreñ ḳhulūs kī haiñ parāganda kam abhī

rutbe kī dhoñs dījiye mansab dikhā.iye

tanqīd meñ usūl-o-zavābit se kyā ġharaz

bas apne nazariye ko murattab dikhā.iye

rah jaa.eñ daañt piis ke pīr-o-javāñ tamām

itnā na ḳhud ko ġhair-mohazzab dikhā.iye

tajdīd kiije ahl-e-tazabzub yaqīn kī

kahtā hai vaqt ab koī kartab dikhā.iye

zehnī maraz pe talḳh davā kyoñ hakīm jī

shīrīñ hai koī nusḳha mujarrab dikhā.iye

jiddat-tarāziyoñ meñ nazar aa.e ġham kā rang

itne mavād kar ke murakkab dikhā.iye

āshiq mizāj logoñ meñ kuchh man-chale bhī haiñ

āñkheñ dikhā ke sab ko na yuuñ lab dikhā.iye

putle ḳhatā ke vaise to haiñ mustanad sharīf

behtar yahī hai husn na be-Dhab dikhā.iye

muñh pherte haiñ dekh ke muñh 'sarfarāz' vo

kis dil se dil ke daaġh unheñ ab dikhā.iye

firqa-kashi ka koi bhi matlab dikhaiye

ghaarat-garon ka ek hi mazhab dikhaiye

milli haqiqaton pe hai parda paDa hua

fikr-o-nazar ka aap hi kaukab dikhaiye

qadren KHulus ki hain paraganda kam abhi

rutbe ki dhons dijiye mansab dikhaiye

tanqid mein usul-o-zawabit se kya gharaz

bas apne nazariye ko murattab dikhaiye

rah jaen dant pis ke pir-o-jawan tamam

itna na KHud ko ghair-mohazzab dikhaiye

tajdid kije ahl-e-tazabzub yaqin ki

kahta hai waqt ab koi kartab dikhaiye

zehni maraz pe talKH dawa kyon hakim ji

shirin hai koi nusKHa mujarrab dikhaiye

jiddat-taraaziyon mein nazar aae gham ka rang

itne mawad kar ke murakkab dikhaiye

aashiq mizaj logon mein kuchh man-chale bhi hain

aankhen dikha ke sab ko na yun lab dikhaiye

putle KHata ke waise to hain mustanad sharif

behtar yahi hai husn na be-Dhab dikhaiye

munh pherte hain dekh ke munh 'sarfaraaz' wo

kis dil se dil ke dagh unhen ab dikhaiye