fishaar-e-tashwish se ibarat hai kawish-e-zindagi hamari

fishār-e-tashvīsh se ibārat hai kāvish-e-zindagī hamārī

ho kaise taz.īn fikr-e-nau kī ho kaise jazboñ kī ābiyārī

ye zaḳhm kyūñkar bhareñge āḳhir ye daaġh kab tak jaleñge āḳhir

kaTegī kaise girānī-e-shab rahegā kab tak ye dard jaarī

miTā.eñ kaise ye dāġh-e-hasrat sameTeñ kaise gul-e-jarāhat

haTā.eñ kaise ye bhārī patthar yahī hai ab zindagī hamārī

ye kyā jagah hai ye kyā nagar hai ki jis kī har raah pur-ḳhatar hai

ki jis kī nas nas meñ shor-o-shar hai ki jis kī manzil azāb-o-ḳhvārī

havā meñ aahaT hai siskiyoñ kī fazā meñ bū ḳhuun kī basī hai

udaas nazroñ meñ bahte sapne diloñ meñ dahshat kā ḳhauf taarī

laboñ pe mohr-e-sukūt hai aur sulagtī āñkhoñ meñ ḳhūnī manzar

lahū meñ ġhaltāñ haiñ ḳhvāb saare lagī hai sapne pe zarb-e-kārī

fishaar-e-tashwish se ibarat hai kawish-e-zindagi hamari

ho kaise tazin fikr-e-nau ki ho kaise jazbon ki aabiyari

ye zaKHm kyunkar bharenge aaKHir ye dagh kab tak jalenge aaKHir

kaTegi kaise girani-e-shab rahega kab tak ye dard jari

miTaen kaise ye dagh-e-hasrat sameTen kaise gul-e-jarahat

haTaen kaise ye bhaari patthar yahi hai ab zindagi hamari

ye kya jagah hai ye kya nagar hai ki jis ki har rah pur-KHatar hai

ki jis ki nas nas mein shor-o-shar hai ki jis ki manzil azab-o-KHwari

hawa mein aahaT hai siskiyon ki faza mein bu KHun ki basi hai

udas nazron mein bahte sapne dilon mein dahshat ka KHauf tari

labon pe mohr-e-sukut hai aur sulagti aankhon mein KHuni manzar

lahu mein ghaltan hain KHwab sare lagi hai sapne pe zarb-e-kari