fitna phir aaj uThane ko hai sar lagta hai

fitna phir aaj uThāne ko hai sar lagtā hai

ḳhuun hī ḳhuun mujhe rañg-e-sahar lagtā hai

ilm kī dev-qadī dekh ke Dar lagtā hai

āsmānoñ se ab insān kā sar lagtā hai

mujh ko lagtā hai nasheman kī mire ḳhair nahīñ

jab kisī shāḳh pe gulshan meñ tabar lagtā hai

maan lo kaise ki maiñ aib sarāpā huuñ faqat

mere ahbāb kā ye husn-e-nazar lagtā hai

kal jise phūñkā thā yā kah ke ki dushman kā hai ghar

sochtā huuñ to vo aaj apnā hī ghar lagtā hai

fan hai vo rog jo lagtā nahīñ sab ko lekin

jis ko lagtā hai use zindagī-bhar lagtā hai

ehtiyātan koī dar phoḌ leñ dīvār meñ aur

shor baḌhtā huā kuchh jānib-e-dar lagtā hai

ek darvāza hai har-samt nikalne ke liye

ho na ho ye to mujhe shaiḳh kā ghar lagtā hai

chaman-e-sher meñ huuñ ik shajar-e-zinda magar

abhī 'mullā' mirī Daalī ye samar lagtā hai

fitna phir aaj uThane ko hai sar lagta hai

KHun hi KHun mujhe rang-e-sahar lagta hai

ilm ki dew-qadi dekh ke Dar lagta hai

aasmanon se ab insan ka sar lagta hai

mujh ko lagta hai nasheman ki mere KHair nahin

jab kisi shaKH pe gulshan mein tabar lagta hai

man lo kaise ki main aib sarapa hun faqat

mere ahbab ka ye husn-e-nazar lagta hai

kal jise phunka tha ya kah ke ki dushman ka hai ghar

sochta hun to wo aaj apna hi ghar lagta hai

fan hai wo rog jo lagta nahin sab ko lekin

jis ko lagta hai use zindagi-bhar lagta hai

ehtiyatan koi dar phoD len diwar mein aur

shor baDhta hua kuchh jaanib-e-dar lagta hai

ek darwaza hai har-samt nikalne ke liye

ho na ho ye to mujhe shaiKH ka ghar lagta hai

chaman-e-sher mein hun ek shajar-e-zinda magar

abhi 'mulla' meri Dali ye samar lagta hai