fitrat-e-ishq kisi rang mein shamil na hui

fitrat-e-ishq kisī rang meñ shāmil na huī

ye sadā vo hai jo pāband-e-salāsil na huī

ham ne kyā kyā na kiyā dil kī tasallī ke liye

aur tasallī hai ki ḳhvāboñ meñ bhī hāsil na huī

koshisheñ laakh huiiñ dil kī fazā dil se mile

ye zamīñ aaj tak is rasm ke qābil na huī

hādse dil pe guzarne ko na kyā kyā guzre

tishnagī aaj tak āsūda-e-sāhil na huī

aap kī chashm-e-tavajjoh kā gilā kyā kiije

pur-taraddud hī rahī hal mirī mushkil na huī

nā-ḳhudā.ī kā bahut shor sunā thā lekin

zindagī merī abhī tak lab-e-sāhil na huī

'hāmid' is ahd se kyā kyā na tavaqqo thī magar

zindagī rasm-o-rah-e-zīst meñ dāḳhil na huī

fitrat-e-ishq kisi rang mein shamil na hui

ye sada wo hai jo paband-e-salasil na hui

hum ne kya kya na kiya dil ki tasalli ke liye

aur tasalli hai ki KHwabon mein bhi hasil na hui

koshishen lakh huin dil ki faza dil se mile

ye zamin aaj tak is rasm ke qabil na hui

hadse dil pe guzarne ko na kya kya guzre

tishnagi aaj tak aasuda-e-sahil na hui

aap ki chashm-e-tawajjoh ka gila kya kije

pur-taraddud hi rahi hal meri mushkil na hui

na-KHudai ka bahut shor suna tha lekin

zindagi meri abhi tak lab-e-sahil na hui

'hamid' is ahd se kya kya na tawaqqo thi magar

zindagi rasm-o-rah-e-zist mein daKHil na hui