fitrat ki band muTThiyon ko kholta raha

fitrat kī band muTThiyoñ ko kholtā rahā

maiñ ā.ina-mizāj thā aur boltā rahā

ik ḳhvāb saare shahr meñ le kar phirā mujhe

ik lau ke saath saath diyā Doltā rahā

yūñhī na thā simaTnā mirā phailnā mirā

apne kināroñ par maiñ badan toltā rahā

mujh peḌ kī jaḌoñ meñ utar kar shifā huā

nusḳha jo ḳhāk-e-pā meñ koī roltā rahā

dil kā koī makīn yūñhī uTh ke chal paḌā

bahtā huā ragoñ meñ koī khaultā rahā

'hāris' tamām shor-sharābe meñ terī misl

ik raag mere kaan meñ ras gholtā rahā

fitrat ki band muTThiyon ko kholta raha

main aaina-mizaj tha aur bolta raha

ek KHwab sare shahr mein le kar phira mujhe

ek lau ke sath sath diya Dolta raha

yunhi na tha simaTna mera phailna mera

apne kinaron par main badan tolta raha

mujh peD ki jaDon mein utar kar shifa hua

nusKHa jo KHak-e-pa mein koi rolta raha

dil ka koi makin yunhi uTh ke chal paDa

bahta hua ragon mein koi khaulta raha

'haaris' tamam shor-sharabe mein teri misl

ek rag mere kan mein ras gholta raha