fitrat ulaT ke KHwab dikhane diye gae

fitrat ulaT ke ḳhvāb dikhāne diye ga.e

gūñgoñ ko bad-zabānī ke ta.ane diye ga.e

rāhat kī pairvī meñ takalluf gañvā diyā

āñgan meñ ġhair log bhī aane diye ga.e

andhoñ kī bārgāh meñ āñkheñ fuzūl thiiñ

ik sar-burīda jism ko shāne diye ga.e

ik ret kī jabīn pe patthar kī Thokareñ

be-ghar musāfiroñ ko Thikāne diye ga.e

paanī kī maat tishna-laboñ ko na thī qubūl

sad shukr mujh ko ashk bahāne diye ga.e

ye āsmāñ zamīn kī nālain rah gayā

badle meñ us ko taare ugāne diye ga.e

ham tīrgī ke saath numāyāñ the bazm meñ

un ko to un ke ghar se bhī laane diye ga.e

ham pairāhan ke taar se bāñdhe hue vajūd

tasbīh ke mizāj ko daane diye ga.e

do lāshe hī to ghoḌoñ ke paañv kā rizq the

baaqī to saare lāshe uThāne diye ga.e

kitne zamāne lamhoñ kī ġhaflat se mar ga.e

saa.at kī bandagī ko zamāne diye ga.e

bujhte hue charāġh kī tābinda raushnī

vo raushnī ki jis ko churāne diye ga.e

sajde mirī jabīn meñ rakkhe ga.e magar

āñkhoñ meñ mujh ko jism basāne diye ga.e

'kāzim' kisī ke ġham kī rifāqat kā shukriya

mujh ko bhī kuchh charāġh jalāne diye ga.e

fitrat ulaT ke KHwab dikhane diye gae

gungon ko bad-zabani ke tane diye gae

rahat ki pairwi mein takalluf ganwa diya

aangan mein ghair log bhi aane diye gae

andhon ki bargah mein aankhen fuzul thin

ek sar-burida jism ko shane diye gae

ek ret ki jabin pe patthar ki Thokaren

be-ghar musafiron ko Thikane diye gae

pani ki mat tishna-labon ko na thi qubul

sad shukr mujh ko ashk bahane diye gae

ye aasman zamin ki nalain rah gaya

badle mein us ko tare ugane diye gae

hum tirgi ke sath numayan the bazm mein

un ko to un ke ghar se bhi lane diye gae

hum pairahan ke tar se bandhe hue wajud

tasbih ke mizaj ko dane diye gae

do lashe hi to ghoDon ke panw ka rizq the

baqi to sare lashe uThane diye gae

kitne zamane lamhon ki ghaflat se mar gae

saat ki bandagi ko zamane diye gae

bujhte hue charagh ki tabinda raushni

wo raushni ki jis ko churane diye gae

sajde meri jabin mein rakkhe gae magar

aankhon mein mujh ko jism basane diye gae

'kazim' kisi ke gham ki rifaqat ka shukriya

mujh ko bhi kuchh charagh jalane diye gae