fitratan lazim hai hum par pahle pani DhunDhna

fitratan lāzim hai ham par pahle paanī DhūñDhnā

pyaas bujh jaa.e to phir tishna-dahānī DhūñDhnā

ek-tarfa 'ishq kyā hai kyā hai zauq-e-shā’irī

dūsre ke lafzoñ meñ apne ma'ānī DhūñDhnā

koshisheñ karte raho lekin ye mumkin to nahīñ

saath chalnā sab ke aur apnī ravānī DhūñDhnā

chain se rahtā huuñ to bechain ho uThtā hai dil

kis ne sikhlāyā hai dil ko saḳht-jānī DhūñDhnā

rāt-din bas dekhte rahnā kisī tasvīr ko

rāt-din ḳhāmoshiyoñ kī tarjumānī DhūñDhnā

ḳhud-ġharaz kaise nahīñ huuñ aap hī farmā.iye

sab kā qissa sunñā aur apnī kahānī DhūñDhnā

ye junūñ hai yā himāqat kaun batlā.e 'amit'

qaid ho jaanā makāñ meñ lā-makānī DhūñDhnā

fitratan lazim hai hum par pahle pani DhunDhna

pyas bujh jae to phir tishna-dahani DhunDhna

ek-tarfa 'ishq kya hai kya hai zauq-e-sha’iri

dusre ke lafzon mein apne ma'ani DhunDhna

koshishen karte raho lekin ye mumkin to nahin

sath chalna sab ke aur apni rawani DhunDhna

chain se rahta hun to bechain ho uThta hai dil

kis ne sikhlaya hai dil ko saKHt-jaani DhunDhna

raat-din bas dekhte rahna kisi taswir ko

raat-din KHamoshiyon ki tarjumani DhunDhna

KHud-gharaz kaise nahin hun aap hi farmaiye

sab ka qissa sunna aur apni kahani DhunDhna

ye junun hai ya himaqat kaun batlae 'amit'

qaid ho jaana makan mein la-makani DhunDhna