fughan ki tarah hai azan ki tarah hai

fuġhāñ kī tarah hai azaañ kī tarah hai

har insān shāh-e-jahāñ kī tarah hai

yaqīñ muddatoñ se gumāñ kī tarah hai

ki har mausam-e-gul ḳhizāñ kī tarah hai

kisī ġham se kamtar nahīñ koī bhī ġham

ki har ġham ġham-e-nā-gahāñ kī tarah hai

ye kis kī sadā hai jo maiñ sun rahā huuñ

shikast-e-dil-e-dostāñ kī tarah hai

jahāñ aarzū ban ke barsoñ rahe the

vo dil aaj ḳhālī makāñ kī tarah hai

tire saath guzrā huā ek lamha

kisī lamha-e-jāvedāñ kī tarah hai

jise dekhtā huuñ maiñ apne vatan meñ

pareshān urdu zabāñ kī tarah hai

fughan ki tarah hai azan ki tarah hai

har insan shah-e-jahan ki tarah hai

yaqin muddaton se guman ki tarah hai

ki har mausam-e-gul KHizan ki tarah hai

kisi gham se kamtar nahin koi bhi gham

ki har gham gham-e-na-gahan ki tarah hai

ye kis ki sada hai jo main sun raha hun

shikast-e-dil-e-dostan ki tarah hai

jahan aarzu ban ke barson rahe the

wo dil aaj KHali makan ki tarah hai

tere sath guzra hua ek lamha

kisi lamha-e-jawedan ki tarah hai

jise dekhta hun main apne watan mein

pareshan urdu zaban ki tarah hai