fughan se zabt-e-junun ka nizam TuT gaya

fuġhāñ se zabt-e-junūñ kā nizām TuuT gayā

ki mere haath se merā hī jaam TuuT gayā

vahī haiñ tauq-o-salāsil vahī nizām-e-chaman

vo kaun haiñ jo ye kahte haiñ daam TuuT gayā

zarūr pīr-e-muġhāñ kā bhī kuchh ishāra thā

ġhalat kahā ki muqaddar se jaam TuuT gayā

bikhar ga.e mirī ḳhātir hayāt ke gesū

kabhī jo shab ke sitāroñ kā daam TuuT gayā

kiyā thā jis ne haqā.eq se ham ko begāna

vo ek nashsha-e-kaif-e-davām TuuT gayā

tumhāre qurb kī saa.at meñ yuuñ huā mahsūs

ki jaise silsila-e-sub.h-o-shām TuuT gayā

usūl-e-rāh-numā se jahāñ meñ ai 'maikash'

hazār daam bane ek daam TuuT gayā

fughan se zabt-e-junun ka nizam TuT gaya

ki mere hath se mera hi jam TuT gaya

wahi hain tauq-o-salasil wahi nizam-e-chaman

wo kaun hain jo ye kahte hain dam TuT gaya

zarur pir-e-mughan ka bhi kuchh ishaara tha

ghalat kaha ki muqaddar se jam TuT gaya

bikhar gae meri KHatir hayat ke gesu

kabhi jo shab ke sitaron ka dam TuT gaya

kiya tha jis ne haqaeq se hum ko begana

wo ek nashsha-e-kaif-e-dawam TuT gaya

tumhaare qurb ki saat mein yun hua mahsus

ki jaise silsila-e-subh-o-sham TuT gaya

usul-e-rah-numa se jahan mein ai 'maikash'

hazar dam bane ek dam TuT gaya