funun-e-waqt ki mujh par asas rakh dena

funūn-e-vaqt kī mujh par asaas rakh denā

bulandiyāñ mire paañv ke paas rakh denā

banānā pahle samundar sā zarf-dār mujhe

phir us ke hoñToñ pe sadiyoñ kī pyaas rakh denā

rahe na mas.ala koī hamārī āmad-o-raft

tum ik charāġh darīche ke paas rakh denā

khulī fazā ke parindoñ kī tarah aa milnā

uThā ke taaq meñ ḳhauf-o-hirās rakh denā

nikāl kar kahīñ bāhar na dafn karnā mujhe

darūn-e-dil hī kahīñ ās-pās rakh denā

mire liye to faqat nashsha-e-badan hai bahut

uThā ke ye mai-o-mīnā gilās rakh denā

funun-e-waqt ki mujh par asas rakh dena

bulandiyan mere panw ke pas rakh dena

banana pahle samundar sa zarf-dar mujhe

phir us ke honTon pe sadiyon ki pyas rakh dena

rahe na masala koi hamari aamad-o-raft

tum ek charagh dariche ke pas rakh dena

khuli faza ke parindon ki tarah aa milna

uTha ke taq mein KHauf-o-hiras rakh dena

nikal kar kahin bahar na dafn karna mujhe

darun-e-dil hi kahin aas-pas rakh dena

mere liye to faqat nashsha-e-badan hai bahut

uTha ke ye mai-o-mina gilas rakh dena