furqat ki bhayanak raaton ko is tarah guzara karta hun

furqat kī bhayānak rātoñ ko is tarah guzārā kartā huuñ

dil mujh ko pukārā kartā hai maiñ tum ko pukārā kartā huuñ

ab un ke tasavvur se maiñ ne andāz-e-junūñ bhī siikh liye

har ḳhaar se bāteñ kartā huuñ har gul ko ishārā kartā huuñ

ye rañg-e-junūn-e-ishq hai kyā is rañg-e-junūñ ko kyā kahiye

maiñ jis se mohabbat kartā huuñ ḳhud us se kinārā kartā huuñ

ḳhāmosh fazā.eñ dekhtī haiñ yā chāñd sitāre sunte haiñ

jab yaad mujhe tum aate ho jab tum ko pukārā kartā huuñ

saaqī kī nigāh-e-mast mujhe jab yaad 'shamīm' aa jaatī hai

us vaqt hī apne taaq se maiñ shīshoñ ko utārā kartā huuñ

furqat ki bhayanak raaton ko is tarah guzara karta hun

dil mujh ko pukara karta hai main tum ko pukara karta hun

ab un ke tasawwur se main ne andaz-e-junun bhi sikh liye

har KHar se baaten karta hun har gul ko ishaara karta hun

ye rang-e-junun-e-ishq hai kya is rang-e-junun ko kya kahiye

main jis se mohabbat karta hun KHud us se kinara karta hun

KHamosh fazaen dekhti hain ya chand sitare sunte hain

jab yaad mujhe tum aate ho jab tum ko pukara karta hun

saqi ki nigah-e-mast mujhe jab yaad 'shamim' aa jati hai

us waqt hi apne taq se main shishon ko utara karta hun