furqat mein koi zist ka saman nahin hota

furqat meñ koī ziist kā sāmāñ nahīñ hotā

mar jaa.eñ to marnā koī āsāñ nahīñ hotā

chup huuñ ki taḌapne kā bhī maqdūr nahīñ hai

darmāñ ise samjhe ho ye darmāñ nahīñ hotā

ausān bhulā dete haiñ maujoñ ke thapeḌe

milnā dur-e-maqsūd kā āsān nahīñ hotā

tum haal to pūchho kabhī dīvāna-e-ġham kā

bekār koī chāk-garebāñ nahīñ hotā

us vaqt unheñ fikr huī chāragarī kī

jab maut se baḌh kar koī darmāñ nahīñ hotā

har Thes pe pahle se sivā aate haiñ aañsū

hāsil unheñ ab dost kā dāmāñ nahīñ hotā

kyā in dinoñ mātam hai kisī ahl-e-vafā kā

kyoñ aap kī mahfil meñ charāġhāñ nahīñ hotā

mujh ko to karīmī pe tirī naaz hai har dam

maiñ kab tirā minnat-kash-e-ehsāñ nahīñ hotā

jab un kā karam thā 'shifā' har ik kā karam thā

ab mujh pe koī mā.il-e-ehsāñ nahīñ hotā

furqat mein koi zist ka saman nahin hota

mar jaen to marna koi aasan nahin hota

chup hun ki taDapne ka bhi maqdur nahin hai

darman ise samjhe ho ye darman nahin hota

ausan bhula dete hain maujon ke thapeDe

milna dur-e-maqsud ka aasan nahin hota

tum haal to puchho kabhi diwana-e-gham ka

bekar koi chaak-gareban nahin hota

us waqt unhen fikr hui chaaragari ki

jab maut se baDh kar koi darman nahin hota

har Thes pe pahle se siwa aate hain aansu

hasil unhen ab dost ka daman nahin hota

kya in dinon matam hai kisi ahl-e-wafa ka

kyon aap ki mahfil mein charaghan nahin hota

mujh ko to karimi pe teri naz hai har dam

main kab tera minnat-kash-e-ehsan nahin hota

jab un ka karam tha 'shifa' har ek ka karam tha

ab mujh pe koi mail-e-ehsan nahin hota