fursat agar ho paDhiye zara dastan-e-waqt

fursat agar ho paḌhiye zarā dāstān-e-vaqt

maġhrūr ho ke ḳhaak hue hukmrān-e-vaqt

sajdoñ meñ sar kaTā ke rahe ham hī sar-buland

ham kāmyāb ho ke bane kāmrān-e-vaqt

mumkin nahīñ thā dīn-e-mohammad ne kar diyā

har zarra regzār kā ik kahkashān-e-vaqt

jo ḳhvāhishāt-e-nafs ke muddat se hoñ ġhulām

kyā inqilāb lā.eñge vo nau-javān-e-vaqt

husn-o-jamāl chhīn liyā guzre vaqt ne

chehre chhupā.e phirte haiñ ab gul-ruḳhān-e-vaqt

piine kī baat duur bahakte haiñ bin piye

saaqī se aañkh milte hī ye maikshān-e-vaqt

mahshar kī fikr kījiye 'mahshar' janāb aaj

kal ye na ho ki TuuT paḌe āsmān-e-vaqt

fursat agar ho paDhiye zara dastan-e-waqt

maghrur ho ke KHak hue hukmran-e-waqt

sajdon mein sar kaTa ke rahe hum hi sar-buland

hum kaamyab ho ke bane kaamran-e-waqt

mumkin nahin tha din-e-mohammad ne kar diya

har zarra regzar ka ek kahkashan-e-waqt

jo KHwahishat-e-nafs ke muddat se hon ghulam

kya inqilab laenge wo nau-jawan-e-waqt

husn-o-jamal chhin liya guzre waqt ne

chehre chhupae phirte hain ab gul-ruKHan-e-waqt

pine ki baat dur bahakte hain bin piye

saqi se aankh milte hi ye maikshan-e-waqt

mahshar ki fikr kijiye 'mahshar' janab aaj

kal ye na ho ki TuT paDe aasman-e-waqt