fusun-e-harf le gaya tilism-e-KHwab le gaya

fusūn-e-harf le gayā tilism-e-ḳhvāb le gayā

varaq-varaq usī kā thā vahī kitāb le gayā

abhī nigah jhukī na thī ki maiñ ne hoñT rakh diye

savāl vo na kar sakā magar javāb le gayā

mujhe pata thā raah meñ charāġh jal na pā.egā

vahāñ gayā to apne saath māhtāb le gayā

mirī azal kī tishnagī bujhā gayā vo narm-dil

nashāt-e-āb de gayā ġham-e-sarāb le gayā

thā dekhne meñ sāda-rū magar baḌā zahīn thā

mujhe gunāhgār kar ke vo savāb le gayā

nigāh-e-imtiyāz kā shikār maiñ huā 'imām'

yahāñ vo ḳhaar de gayā vahāñ gulāb le gayā

fusun-e-harf le gaya tilism-e-KHwab le gaya

waraq-waraq usi ka tha wahi kitab le gaya

abhi nigah jhuki na thi ki main ne honT rakh diye

sawal wo na kar saka magar jawab le gaya

mujhe pata tha rah mein charagh jal na paega

wahan gaya to apne sath mahtab le gaya

meri azal ki tishnagi bujha gaya wo narm-dil

nashat-e-ab de gaya gham-e-sarab le gaya

tha dekhne mein sada-ru magar baDa zahin tha

mujhe gunahgar kar ke wo sawab le gaya

nigah-e-imtiyaz ka shikar main hua 'imam'

yahan wo KHar de gaya wahan gulab le gaya