ga raha hun KHamushi mein dard ke naghmat main

gā rahā huuñ ḳhāmushī meñ dard ke naġhmāt maiñ

ban gayā ik sāhil-e-vīrāñ kī tanhā raat maiñ

ek do sajde zarā shahr-e-nigārāñ kī taraf

ai ġham-e-hastī Thahar chaltā huuñ tere saath maiñ

zindagī merī tamannāoñ mire ḳhvāboñ kā ruup

phuul maiñ huuñ rañg maiñ huuñ abr maiñ barsāt maiñ

ik shagufta dard ik sho.aloñ meñ bujhtī chāñdnī

ajnabī shahroñ se laayā huuñ yahī sauġhāt maiñ

bārhā is sādgī par ḳhud hañsī aa.ī mujhe

kar rahā huuñ kis zamāne meñ vafā kī baat maiñ

har ubhartī lau se raushan ho gayā merā 'zamīr'

bik gayā har muskurātī raushnī ke haath maiñ

ga raha hun KHamushi mein dard ke naghmat main

ban gaya ek sahil-e-viran ki tanha raat main

ek do sajde zara shahr-e-nigaran ki taraf

ai gham-e-hasti Thahar chalta hun tere sath main

zindagi meri tamannaon mere KHwabon ka rup

phul main hun rang main hun abr main barsat main

ek shagufta dard ek shoalon mein bujhti chandni

ajnabi shahron se laya hun yahi saughat main

barha is sadgi par KHud hansi aai mujhe

kar raha hun kis zamane mein wafa ki baat main

har ubharti lau se raushan ho gaya mera 'zamir'

bik gaya har muskuraati raushni ke hath main