ghafil teri nazar hi se parda uTha na tha

ġhāfil tirī nazar hī se parda uThā na thā

varna vo kis maqām pe jalva-numā na thā

raushan charāġh-e-ishq ne kī manzil-e-hayāt

varna vo tīrgī thī ki kuchh sūjhtā na thā

maqsūd ek tere hī dar kī thī justujū

dair-o-haram se mujh ko koī vāsta na thā

āvāz de rahe the jise be-ḳhudī meñ ham

dekhā to vo hameñ the koī dūsrā na thā

vo to shikāyat apnī vafāoñ kī thī huzūr

kuchh aap kī jafāoñ kā shikva-gila na thā

maanā ki duur thā to nigāhoñ se ai karīm

lekin tirā ḳhayāl to dil se judā na thā

ham aap apnī manzil-e-maqsūd the 'umīd'

jaate kahāñ ki ḳhud se pare rāsta na thā

ghafil teri nazar hi se parda uTha na tha

warna wo kis maqam pe jalwa-numa na tha

raushan charagh-e-ishq ne ki manzil-e-hayat

warna wo tirgi thi ki kuchh sujhta na tha

maqsud ek tere hi dar ki thi justuju

dair-o-haram se mujh ko koi wasta na tha

aawaz de rahe the jise be-KHudi mein hum

dekha to wo hamein the koi dusra na tha

wo to shikayat apni wafaon ki thi huzur

kuchh aap ki jafaon ka shikwa-gila na tha

mana ki dur tha to nigahon se ai karim

lekin tera KHayal to dil se juda na tha

hum aap apni manzil-e-maqsud the 'umid'

jate kahan ki KHud se pare rasta na tha