ghaalib ke kabhi mir ke diwan se chehre

'ġhālib' ke kabhī 'mīr' ke dīvān se chehre

mushkil se samajh aate haiñ āsān se chehre

dil shahr-e-tamannā hai muhāfiz haiñ nigāheñ

rahte haiñ yahāñ be-sar-o-sāmān se chehre

parchhā.iyoñ kī qaid meñ dam toḌ rahe haiñ

sāhir kī kisī nazm ke 'unvān se chehre

hālāt se laḌne kā hunar siikh rahe haiñ

muskān lapeTe hue sunsān se chehre

har samt añdherā hai tamāshā-e-kuhan hai

māyūs haiñ insān se insān se chehre

kyoñ haath meñ arjun ke dhanush kaañp rahā hai

lashkar meñ haiñ dushman ke dil-o-jān se chehre

'ghaalib' ke kabhi 'mir' ke diwan se chehre

mushkil se samajh aate hain aasan se chehre

dil shahr-e-tamanna hai muhafiz hain nigahen

rahte hain yahan be-sar-o-saman se chehre

parchhaiyon ki qaid mein dam toD rahe hain

sahir ki kisi nazm ke 'unwan se chehre

haalat se laDne ka hunar sikh rahe hain

muskan lapeTe hue sunsan se chehre

har samt andhera hai tamasha-e-kuhan hai

mayus hain insan se insan se chehre

kyon hath mein arjun ke dhanush kanp raha hai

lashkar mein hain dushman ke dil-o-jaan se chehre