ghaarat-garon ke pas hai kya apne pas kya

ġhārat-garoñ ke paas hai kyā apne paas kyā

Thānī hai sidq-e-dil se to ḳhauf-o-hirās kyā

lahja hī talḳh ho to zabāñ kī miThās kyā

āñkheñ barahna hoñ to badan par libās kyā

kāsoñ meñ le ke shaad haiñ jo zindagī kī bhiik

in dast-basta logoñ kā hosh-o-havās kyā

sabza nahīñ haiñ fahm-o-farāsat kī chādareñ

kal bhī yahī zamīn thī ugtī thī ghaas kyā

hāthoñ meñ haath diije duhā.ī na dījiye

tanzīm-e-amn se haiñ abhī nā-shanās kyā

shohrat nazar meñ ho to balāġhat se kyā ġharaz

sarqe kā ġham nahīñ to ġham-e-iltibās kyā

hai tāliyoñ kī guuñj meñ tauqīr-e-harf-e-ġham

irshād karne vaale kareñ iltimās kyā

ab to chaman meñ kāñToñ ko aa.e to aa.e rahm

barg-e-ḳhizāñ-rasīda ko phūloñ se aas kiyā

sahrā meñ bhī hai aap ke ruḳh par shaguftagī

haiñ yaad pokhare vo akūl-o-parās kyā

buzdil haiñ aap varna samundar khañgālte

motī bhī chal ke aatā hai sāhil ke paas kyā

dariyā se abr ban ke sab uḌ jaa.eñ nekiyāñ

hai 'sarfarāz' ye bhī qarīn-e-qayās kyā

ghaarat-garon ke pas hai kya apne pas kya

Thani hai sidq-e-dil se to KHauf-o-hiras kya

lahja hi talKH ho to zaban ki miThas kya

aankhen barahna hon to badan par libas kya

kason mein le ke shad hain jo zindagi ki bhik

in dast-basta logon ka hosh-o-hawas kya

sabza nahin hain fahm-o-farasat ki chadaren

kal bhi yahi zamin thi ugti thi ghas kya

hathon mein hath dije duhai na dijiye

tanzim-e-amn se hain abhi na-shanas kya

shohrat nazar mein ho to balaghat se kya gharaz

sarqe ka gham nahin to gham-e-iltibas kya

hai taliyon ki gunj mein tauqir-e-harf-e-gham

irshad karne wale karen iltimas kya

ab to chaman mein kanTon ko aae to aae rahm

barg-e-KHizan-rasida ko phulon se aas kiya

sahra mein bhi hai aap ke ruKH par shaguftagi

hain yaad pokhare wo akul-o-paras kya

buzdil hain aap warna samundar khangalte

moti bhi chal ke aata hai sahil ke pas kya

dariya se abr ban ke sab uD jaen nekiyan

hai 'sarfaraaz' ye bhi qarin-e-qayas kya