gae ji se chhuTe buton ki jafa se

ga.e jī se chhūTe butoñ kī jafā se

yahī baat ham chāhte the ḳhudā se

vo apnī hī ḳhūbī pe rahtā hai nāzāñ

maro yā jiyo koī us kī balā se

koī ham se khulte haiñ band us qabā ke

ye 'uqde khuleñge kisū kī du'ā se

pashemān tauba se hogā 'adam meñ

ki ġhāfil chalā shaiḳh lutf-e-havā se

na rakkhī mirī ḳhaak bhī us galī meñ

kudūrat mujhe hai nihāyat sabā se

jigar sū-e-mizhgāñ khiñchā jaa.e hai kuchh

magar dīda-e-tar haiñ lohū ke pyāse

agar chashm hai to vahī 'ain haq hai

ta'assub tujhe hai 'ajab mā-sivā se

tabīb-e-subuk-aql hargiz na samjhā

huā dard-e-'ishq aah duunā davā se

Tuk ai mudda'ī chashm-e-insāf vā kar

ki baiThe haiñ ye qāfiye kis adā se

na shikva shikāyat na harf-o-hikāyat

kaho 'mīr' jī aaj kyuuñ ho ḳhafā se

gae ji se chhuTe buton ki jafa se

yahi baat hum chahte the KHuda se

wo apni hi KHubi pe rahta hai nazan

maro ya jiyo koi us ki bala se

koi hum se khulte hain band us qaba ke

ye 'uqde khulenge kisu ki du'a se

pasheman tauba se hoga 'adam mein

ki ghafil chala shaiKH lutf-e-hawa se

na rakkhi meri KHak bhi us gali mein

kudurat mujhe hai nihayat saba se

jigar su-e-mizhgan khincha jae hai kuchh

magar dida-e-tar hain lohu ke pyase

agar chashm hai to wahi 'ain haq hai

ta'assub tujhe hai 'ajab ma-siwa se

tabib-e-subuk-aql hargiz na samjha

hua dard-e-'ishq aah duna dawa se

Tuk ai mudda'i chashm-e-insaf wa kar

ki baiThe hain ye qafiye kis ada se

na shikwa shikayat na harf-o-hikayat

kaho 'mir' ji aaj kyun ho KHafa se