gai ruton ko bhi yaad rakhna nai ruton ke bhi bab paDhna

ga.ī rutoñ ko bhī yaad rakhnā na.ī rutoñ ke bhī baab paḌhnā

gulāb-chehroñ ne jo likhī hai tamāzatoñ kī kitāb paḌhnā

tamām rañgoñ kī ek rañgat tamām mausam kī ek nig.hat

tamām chehre hasīn likhnā tamām āñkheñ sarāb paḌhnā

har ek āñgan ḳhamosh pahre har ek lab par sukūt taarī

hamāre ghar ghar jo TūTte haiñ qayāmatoñ ke azaab paḌhnā

khulī fazāoñ meñ par-kushā.ī mire lahū kā ḳhamīr Thahrī

magar mire un kaTe paroñ meñ uḌaan ke iztirāb paḌhnā

mire ḳhayāloñ meñ aaj bhī haiñ vo bāñkpan kī mahaktī rāteñ

kisī kī āñkhoñ se jaam piinā kisī badan ke gulāb paḌhnā

bas ek rasta hai guftugū kā bas ek sūrat hai rābte kī

ḳhatoñ meñ un se savāl karnā ḳhatoñ meñ un ke javāb paḌhnā

'hasan' hamārī udaas āñkheñ kisī kī āñkhoñ se kah rahī haiñ

jo ham ne tum ne kabhī bune the visāl-lamhoñ ke ḳhvāb paḌhnā

gai ruton ko bhi yaad rakhna nai ruton ke bhi bab paDhna

gulab-chehron ne jo likhi hai tamazaton ki kitab paDhna

tamam rangon ki ek rangat tamam mausam ki ek nighat

tamam chehre hasin likhna tamam aankhen sarab paDhna

har ek aangan KHamosh pahre har ek lab par sukut tari

hamare ghar ghar jo TuTte hain qayamaton ke azab paDhna

khuli fazaon mein par-kushai mere lahu ka KHamir Thahri

magar mere un kaTe paron mein uDan ke iztirab paDhna

mere KHayalon mein aaj bhi hain wo bankpan ki mahakti raaten

kisi ki aankhon se jam pina kisi badan ke gulab paDhna

bas ek rasta hai guftugu ka bas ek surat hai rabte ki

KHaton mein un se sawal karna KHaton mein un ke jawab paDhna

'hasan' hamari udas aankhen kisi ki aankhon se kah rahi hain

jo hum ne tum ne kabhi bune the visal-lamhon ke KHwab paDhna