ghair dushman bhi wafadar samajhte hain mujhe

ġhair dushman bhī vafādār samajhte haiñ mujhe

ye mire apne to dīvār samajhte haiñ mujhe

merā kirdār havāoñ ne badal Daalā hai

maiñ huuñ mā'sūm gunahgār samajhte haiñ mujhe

jiit kar jang shahīdoñ meñ huā naam apnā

phir bhī kuchh log to ġhaddār samajhte haiñ mujhe

maiñ vo insāñ huuñ jo sajde meñ jhukātā huuñ sar

aur vo ḳhil'at kā talabgār samajhte haiñ mujhe

itnā bīmār huuñ maiñ soch nahīñ saktā huuñ

kitne nādāñ haiñ samajh-dār samajhte haiñ mujhe

bikne vaale kī ye bāzār kareñ tai qīmat

kyoñ jahāñ vaale ḳharīdār samajhte haiñ mujhe

in añdheroñ sā hī qaa.em hai bharam un kā bhī

ḳhud ke jaisā hī jo makkār samajhte haiñ mujhe

ab to taklīf hī mahsūs nahīñ hotī hai

is liye aap adākār samajhte haiñ mujhe

jab se badle haiñ ye hālāt ke manzar maiñ ne

tab se ahbāb asar-dār samajhte haiñ mujhe

ghair dushman bhi wafadar samajhte hain mujhe

ye mere apne to diwar samajhte hain mujhe

mera kirdar hawaon ne badal Dala hai

main hun ma'sum gunahgar samajhte hain mujhe

jit kar jang shahidon mein hua nam apna

phir bhi kuchh log to ghaddar samajhte hain mujhe

main wo insan hun jo sajde mein jhukata hun sar

aur wo KHil'at ka talabgar samajhte hain mujhe

itna bimar hun main soch nahin sakta hun

kitne nadan hain samajh-dar samajhte hain mujhe

bikne wale ki ye bazar karen tai qimat

kyon jahan wale KHaridar samajhte hain mujhe

in andheron sa hi qaem hai bharam un ka bhi

KHud ke jaisa hi jo makkar samajhte hain mujhe

ab to taklif hi mahsus nahin hoti hai

is liye aap adakar samajhte hain mujhe

jab se badle hain ye haalat ke manzar main ne

tab se ahbab asar-dar samajhte hain mujhe