ghairon ki anjuman mein mera hi tazkira ho ye baat to ghalat hai

ġhairoñ kī anjuman meñ merā hī tazkira ho ye baat to ġhalat hai

jo kuchh sunā hai maiñ ne tum ne nahīñ sunā ho ye baat to ġhalat hai

sāzish kā silsila hai shaitān hañs rahā hai insān so rahā hai

jo aaj ho rahā hai kal bhī nahīñ huā ho ye baat to ġhalat hai

is daur kī siyāsat makkāriyoñ kā tūfāñ ḳhud-ġharziyoñ kī āñdhī

jo muntaḳhab huā hai vo shaḳhs pārsā ho ye baat to ġhalat hai

jamhūriyat ke mohre rahbar bane hue haiñ kam-zarf ḳhud-nigar haiñ

un se kabhī kisī kā koī bhalā huā ho ye baat to ġhalat hai

āñkhoñ meñ garm aañsū sīnoñ meñ sard aaheñ majbūr iltijā.eñ

duniyā kī gardishoñ se insān bach gayā ho ye baat to ġhalat hai

vo daur thā nirālā suqrāt ne piyā thā jab zahr kā piyāla

is daur meñ bhī munsif zālim kā ham-navā ho ye baat to ġhalat hai

merī ḳhushī se nā-ḳhush aur mujh se bad-gumāñ hai dushman nahīñ to kyā hai

merī tabāhiyoñ par vo ḳhush nahīñ huā ho ye baat to ġhalat hai

dil māntā nahīñ hai par aql ko yaqīñ hai haq baat bhī yahī hai

kahte haiñ jis ko insāñ mahrūmī-e-anā ho ye baat to ġhalat hai

nazroñ se duur ho kar kis haal meñ hai koī 'kausar' ye kaun jaane

lekin nazar ke aage ham-sāya jal rahā ho ye baat to ġhalat hai

ghairon ki anjuman mein mera hi tazkira ho ye baat to ghalat hai

jo kuchh suna hai main ne tum ne nahin suna ho ye baat to ghalat hai

sazish ka silsila hai shaitan hans raha hai insan so raha hai

jo aaj ho raha hai kal bhi nahin hua ho ye baat to ghalat hai

is daur ki siyasat makkariyon ka tufan KHud-gharziyon ki aandhi

jo muntaKHab hua hai wo shaKHs parsa ho ye baat to ghalat hai

jamhuriyat ke mohre rahbar bane hue hain kam-zarf KHud-nigar hain

un se kabhi kisi ka koi bhala hua ho ye baat to ghalat hai

aankhon mein garm aansu sinon mein sard aahen majbur iltijaen

duniya ki gardishon se insan bach gaya ho ye baat to ghalat hai

wo daur tha nirala suqraat ne piya tha jab zahr ka piyala

is daur mein bhi munsif zalim ka ham-nawa ho ye baat to ghalat hai

meri KHushi se na-KHush aur mujh se bad-guman hai dushman nahin to kya hai

meri tabahiyon par wo KHush nahin hua ho ye baat to ghalat hai

dil manta nahin hai par aql ko yaqin hai haq baat bhi yahi hai

kahte hain jis ko insan mahrumi-e-ana ho ye baat to ghalat hai

nazron se dur ho kar kis haal mein hai koi 'kausar' ye kaun jaane

lekin nazar ke aage ham-saya jal raha ho ye baat to ghalat hai