ghairon ki bastiyon mein rahne ko aa rahe hain

ġhairoñ kī bastiyoñ meñ rahne ko aa rahe haiñ

is dil ko chhoḌ kar ham duniyā banā rahe haiñ

sakhiyāñ saheliyāñ vo guzrā jahāñ laḌakpan

baiThe biThā.e ab kyoñ sab yaad aa rahe haiñ

rozī kī justujū meñ apnoñ ko chhoḌ chalnā

maazī ke saare manzar āñkhoñ pe chhā rahe haiñ

rokā thā sab ne ham ko lekin na ruk sake ham

ab ajnabī zamīñ ke dukh raas aa rahe haiñ

āñkhoñ pe chhā rahī hai barkhā ga.e dinoñ kī

guzre dinoñ ke qisse phir dil jalā rahe haiñ

miTTī kī soñdhī ḳhushbū phir yaad aa rahī hai

malhār vo rutoñ ke ḳhud ko sunā rahe haiñ

ḳhushiyoñ se ḳhud ko kitnī mahrūm kar liyā hai

pardes meñ 'ġhazal' kyoñ ham rañj uThā rahe haiñ

ghairon ki bastiyon mein rahne ko aa rahe hain

is dil ko chhoD kar hum duniya bana rahe hain

sakhiyan saheliyan wo guzra jahan laDakpan

baiThe biThae ab kyon sab yaad aa rahe hain

rozi ki justuju mein apnon ko chhoD chalna

mazi ke sare manzar aankhon pe chha rahe hain

roka tha sab ne hum ko lekin na ruk sake hum

ab ajnabi zamin ke dukh ras aa rahe hain

aankhon pe chha rahi hai barkha gae dinon ki

guzre dinon ke qisse phir dil jala rahe hain

miTTi ki sondhi KHushbu phir yaad aa rahi hai

malhaar wo ruton ke KHud ko suna rahe hain

KHushiyon se KHud ko kitni mahrum kar liya hai

pardes mein 'ghazal' kyon hum ranj uTha rahe hain