ghairon se bhi dhoke khae hain apnon se bhi dhoke khae hain

ġhairoñ se bhī dhoke khaa.e haiñ apnoñ se bhī dhoke khaa.e haiñ

tab jā ke kahīñ is duniyā ke andāz samajh meñ aa.e haiñ

vo apnī jafā-e-paiham par dam bhar bhī agar sharmā.e haiñ

ehsās-e-vafādārī ko mire pahroñ pachhtāve aa.e haiñ

ham meñ na mohabbat kī garmī ham meñ na sharāfat kī narmī

insān kaheñ kyoñ sab ham ko ham chalte phirte saa.e haiñ

kuchh phuul guloñ ke haar bane kuchh jins sar-e-bāzār bane

in phūloñ kī qismat kyā kahiye shāḳhoñ hī pe jo murjhā.e haiñ

sahrā-e-ḳhirad meñ hairāñ haiñ kal qāfila-hā-e-rāhravāñ

muñh moḌ liyā hai sūraj ne har samt añdhere chhā.e haiñ

ehsān ba-har-hālat ham par hai un kī badaltī nazroñ kā

jiine ke sahāre ulfat meñ kuchh kho.e haiñ kuchh paa.e haiñ

ummīd ne phir karvaT lī hai badle haiñ fazā ke phir tevar

ab dekhiye kyā barsāte haiñ kuchh bādal ghir kar aa.e haiñ

ham dost nahīñ dushman hī sahī bhaa.ī na sahī berī hī sahī

hamsā.e kā haq to do ham ko ham kuchh bhī na ho hamsā.e haiñ

vo qadr kareñ yā Thukrā deñ ye ahl-e-nazar kī marzī hai

ambār se ḳhār-o-ḳhas kī 'razā' kuchh motī chun kar laa.e haiñ

ghairon se bhi dhoke khae hain apnon se bhi dhoke khae hain

tab ja ke kahin is duniya ke andaz samajh mein aae hain

wo apni jafa-e-paiham par dam bhar bhi agar sharmae hain

ehsas-e-wafadari ko mere pahron pachhtawe aae hain

hum mein na mohabbat ki garmi hum mein na sharafat ki narmi

insan kahen kyon sab hum ko hum chalte phirte sae hain

kuchh phul gulon ke haar bane kuchh jins sar-e-bazar bane

in phulon ki qismat kya kahiye shaKHon hi pe jo murjhae hain

sahra-e-KHirad mein hairan hain kal qafila-ha-e-rahrawan

munh moD liya hai suraj ne har samt andhere chhae hain

ehsan ba-har-haalat hum par hai un ki badalti nazron ka

jine ke sahaare ulfat mein kuchh khoe hain kuchh pae hain

ummid ne phir karwaT li hai badle hain faza ke phir tewar

ab dekhiye kya barsate hain kuchh baadal ghir kar aae hain

hum dost nahin dushman hi sahi bhai na sahi beri hi sahi

hamsae ka haq to do hum ko hum kuchh bhi na ho hamsae hain

wo qadr karen ya Thukra den ye ahl-e-nazar ki marzi hai

ambar se KHar-o-KHas ki 'raza' kuchh moti chun kar lae hain