ghalat kya hai sabhi hum ko agar nakaam kahte hain

ġhalat kyā hai sabhī ham ko agar nākām kahte haiñ

samajh paa.e use kab ham jise ilhām kahte haiñ

liye bāzār meñ hastī khaḌe haiñ aaj apnī ham

lagā lo jitnā dil chāhe hamārā daam kahte haiñ

agar parcham uThāoge baġhāvat kā to tai maano

nazārā jo dikhegā us ko qatl-e-'ām kahte haiñ

gunāhoñ meñ rahe hoñ ham bhī shāmil kyā zarūrī hai

magar munsif hamārā hī likhegā naam kahte haiñ

hamesha hī bulandī par nahīñ rahtā koī Tik kar

Dhalegī dopahar bhī aur hogī shaam kahte haiñ

dupaTTa rām-nāmī oḌhne se kuchh nahīñ hogā

agar shabrī banoge to mileñge raam kahte haiñ

'nazar' aadhe adhūre man se kuchh hāsil nahīñ hotā

ġhalat āġhāz ko bhī ham ġhalat anjām kahte haiñ

ghalat kya hai sabhi hum ko agar nakaam kahte hain

samajh pae use kab hum jise ilham kahte hain

liye bazar mein hasti khaDe hain aaj apni hum

laga lo jitna dil chahe hamara dam kahte hain

agar parcham uThaoge baghawat ka to tai mano

nazara jo dikhega us ko qatl-e-'am kahte hain

gunahon mein rahe hon hum bhi shamil kya zaruri hai

magar munsif hamara hi likhega nam kahte hain

hamesha hi bulandi par nahin rahta koi Tik kar

Dhalegi dopahar bhi aur hogi sham kahte hain

dupaTTa ram-nami oDhne se kuchh nahin hoga

agar shabri banoge to milenge ram kahte hain

'nazar' aadhe adhure man se kuchh hasil nahin hota

ghalat aaghaz ko bhi hum ghalat anjam kahte hain