ghalat sab dalilen ghalat sab hawale

ġhalat sab dalīleñ ġhalat sab havāle

añdhere añdhere ujāle ujāle

mire haal par phabtiyāñ kasne vaale

mabādā tujhe phūñk deñ mere naale

hameñ jān-o-dil se vo apnā banā le

magar ham kahāñ aisī taqdīr vaale

mujhe va.az par va.az farmāne vaale

agar koī terī bhī nīñdeñ churā le

hazāroñ the duniyā meñ iḳhlās vaale

magar gardish-e-vaqt ne piis Daale

rahe zindagī meñ bajā sa.ī-e-paiham

muqaddar kā likkhā magar kaun Taale

mohabbat pe terā ye ehsān hogā

mohabbat meñ jī se guzar jaane vaale

idhar to hai mahkī fazā-e-mohabbat

udhar zehn par chand yādoñ ke jaale

haqīqat hamesha haqīqat rahegī

haqīqat pe parde koī laakh Daale

mohabbat kī nairañgiyāñ tauba tauba

kahīñ rāteñ raushan kahīñ din bhī kaale

koī dam ke mehmāñ haiñ ai zindagī ham

jahāñ tak tujhe raas aanā hai aa le

agar merī hastī khaTaktī hai tujh ko

to le Duub jaatā huuñ ai nāḳhudā le

kisī jān-e-jāñ kī amānat haiñ 'āsī'

ye ashkoñ ke tūfāñ ye aaheñ ye naale

ghalat sab dalilen ghalat sab hawale

andhere andhere ujale ujale

mere haal par phabtiyan kasne wale

mabaada tujhe phunk den mere nale

hamein jaan-o-dil se wo apna bana le

magar hum kahan aisi taqdir wale

mujhe waz par waz farmane wale

agar koi teri bhi ninden chura le

hazaron the duniya mein iKHlas wale

magar gardish-e-waqt ne pis Dale

rahe zindagi mein baja sai-e-paiham

muqaddar ka likkha magar kaun Tale

mohabbat pe tera ye ehsan hoga

mohabbat mein ji se guzar jaane wale

idhar to hai mahki faza-e-mohabbat

udhar zehn par chand yaadon ke jale

haqiqat hamesha haqiqat rahegi

haqiqat pe parde koi lakh Dale

mohabbat ki nairangiyan tauba tauba

kahin raaten raushan kahin din bhi kale

koi dam ke mehman hain ai zindagi hum

jahan tak tujhe ras aana hai aa le

agar meri hasti khaTakti hai tujh ko

to le Dub jata hun ai naKHuda le

kisi jaan-e-jaan ki amanat hain 'asi'

ye ashkon ke tufan ye aahen ye nale