ghalat-salat tha wo jis ko durust man liya

ġhalat-salat thā vo jis ko durust maan liyā

ḳhud apne zabt kā ham ne bhī imtihān liyā

maiñ kyā karūñgā zamāne ko jaan kar āḳhir

yahī bahut hai zamāne ne mujh ko jaan liyā

hamāre hote hue tang paḌ na jaa.e kahīñ

bachī-khuchī sī mohabbat ko khīñch taan liyā

kahīñ vo vasl kā chashma dikhā.ī de na sakā

tumhāre hijr kā sahrā tamām chhān liyā

shikast mānñā āsān to nahīñ phir bhī

kahā charāġh kā ik din havā ne maan liyā

mirī nigāhoñ meñ tasvīr mere qātil kī

vahī thā jis ne mirā āḳhirī bayān liyā

kisī ne kab hai zamīñ par hamārā saath diyā

safar meñ saath liyā bhī to āsmān liyā

milā hai sabr kā ye phal khaḌe khaḌe āḳhir

mujhe daraḳhtoñ ne dil se daraḳht maan liyā

tirī safā.ī meñ ye dil akelā kyā kartā

tumhārā naam vahāñ sab ne yak-zabān liyā

ghalat-salat tha wo jis ko durust man liya

KHud apne zabt ka hum ne bhi imtihan liya

main kya karunga zamane ko jaan kar aaKHir

yahi bahut hai zamane ne mujh ko jaan liya

hamare hote hue tang paD na jae kahin

bachi-khuchi si mohabbat ko khinch tan liya

kahin wo wasl ka chashma dikhai de na saka

tumhaare hijr ka sahra tamam chhan liya

shikast manna aasan to nahin phir bhi

kaha charagh ka ek din hawa ne man liya

meri nigahon mein taswir mere qatil ki

wahi tha jis ne mera aaKHiri bayan liya

kisi ne kab hai zamin par hamara sath diya

safar mein sath liya bhi to aasman liya

mila hai sabr ka ye phal khaDe khaDe aaKHir

mujhe daraKHton ne dil se daraKHt man liya

teri safai mein ye dil akela kya karta

tumhaara nam wahan sab ne yak-zaban liya