gale mein tar-e-gareban hain haar ki surat

gale meñ tār-e-garebāñ haiñ haar kī sūrat

banā huā huuñ sarāpā bahār kī sūrat

azal se ai dil-e-betāb tere sadqe meñ

nazar na aaj tak aa.ī qarār kī sūrat

tum apne tiir ko rahne do mere siine meñ

ki ik shahīd kī hai yādgār kī sūrat

lagā hai mar ke mujhe daaġh bevafā.ī kā

milī hai ḳhaak meñ kyā e.atibār kī sūrat

vo chupke rote haiñ aa aa ke raat ko aksar

mire mazār pe sham-e-mazār kī sūrat

ye iztirāb ki har zarra ḳhaak kā apnī

taḌap rahā hai dil-e-be-qarār kī sūrat

ma.āl-e-hastī-e-bātil kī khiñch ga.ī tasvīr

jo dekhī ek shikasta mazār kī sūrat

hujūm-e-yās ne kyā sard kar diyā dil ko

bujhā huā hai charāġh-e-mazār kī sūrat

faroġh-e-bazm-e-mohabbat hai ik tire dam se

kahāñ chalā dil-e-'muztar' qarār kī sūrat

gale mein tar-e-gareban hain haar ki surat

bana hua hun sarapa bahaar ki surat

azal se ai dil-e-betab tere sadqe mein

nazar na aaj tak aai qarar ki surat

tum apne tir ko rahne do mere sine mein

ki ek shahid ki hai yaadgar ki surat

laga hai mar ke mujhe dagh bewafai ka

mili hai KHak mein kya eatibar ki surat

wo chupke rote hain aa aa ke raat ko aksar

mere mazar pe sham-e-mazar ki surat

ye iztirab ki har zarra KHak ka apni

taDap raha hai dil-e-be-qarar ki surat

maal-e-hasti-e-baatil ki khinch gai taswir

jo dekhi ek shikasta mazar ki surat

hujum-e-yas ne kya sard kar diya dil ko

bujha hua hai charagh-e-mazar ki surat

farogh-e-bazm-e-mohabbat hai ek tere dam se

kahan chala dil-e-'muztar' qarar ki surat