gali gali meri wahshat liye phire hai mujhe

galī galī mirī vahshat liye phire hai mujhe

ki sañg-o-ḳhisht kī lazzat liye phire hai mujhe

na koī manzil-e-maqsūd hai na rāh-e-talab

bhaTakte rahne kī aadat liye phire hai mujhe

na māl-o-zar kī tamannā na zindagī kī havas

na jaane kaun sī quvvat liye phire hai mujhe

haram se dair talak dair se haram kī taraf

na jaane kis kī aqīdat liye phire hai mujhe

ye mufsidoñ kā jahāñ ye tazād kī duniyā

bas ek harf-e-mohabbat liye phire hai mujhe

mujhe kiyā mirī fikr-e-rasā ne āvāra

ki dar-ba-dar mirī shohrat liye phire hai mujhe

jo bas chale na uThūñ tere āstāne se

ye sar-phirā jo hai 'rif.at' liye phire hai mujhe

gali gali meri wahshat liye phire hai mujhe

ki sang-o-KHisht ki lazzat liye phire hai mujhe

na koi manzil-e-maqsud hai na rah-e-talab

bhaTakte rahne ki aadat liye phire hai mujhe

na mal-o-zar ki tamanna na zindagi ki hawas

na jaane kaun si quwwat liye phire hai mujhe

haram se dair talak dair se haram ki taraf

na jaane kis ki aqidat liye phire hai mujhe

ye mufsidon ka jahan ye tazad ki duniya

bas ek harf-e-mohabbat liye phire hai mujhe

mujhe kiya meri fikr-e-rasa ne aawara

ki dar-ba-dar meri shohrat liye phire hai mujhe

jo bas chale na uThun tere aastane se

ye sar-phira jo hai 'rifat' liye phire hai mujhe